Almatyda skýterimen birge kólik qaǵyp ketip, on kún boıy es-tússiz jatqan jasóspirimdi №2 qalalyq balalar klınıkalyq aýrýhanasynyń dárigerleri ekinshi ret ómirge ákelip, aıaǵynan turǵyzdy. Sol sııaqty qalalyq jedel shuǵyl kómek kórsetý aýrýhanasyna jetkizilgen jatyrynda isigi bar, júktiliktiń 13-14 aptalyǵyndaǵy naýqasty kópbeıindi dárigerler komandasy qutqaryp qaldy. Tize berseń, mundaı oqıǵalar legi jetkilikti. Degenmen osylardyń ishinde Qazaqstanda alǵash ret Almatydaǵy Pedıatrııa jáne balalar hırýrgııasy ǵylymı ortalyǵynda balalardaǵy baýyr obyryn emdeýdiń hımıoembolızasııa ádisi engizilip, alǵashqy operasııa júzege asqanyn ilkimdi oqıǵalar qataryna jatqyzýǵa bolady.
Atalǵan operasııa bir jarym jastaǵy qyz balaǵa jasaldy. Eki saǵatqa sozylǵan operasııa sátti ótti. Operasııany kópjyldyq tájirıbesi bar Ulttyq ǵylymı medısınalyq ortalyǵynyń onkoradıology Nııaz Malaev, Pedıatrııa jáne balalar hırýrgııasy ǵylymı ortalyǵynyń bilikti dárigerleri – rentgenhırýrg, balalar ıntervensııalyq kardıology Azız Ońlasynov jáne balalar onkohırýrgy, rentgenhırýrg Begaıdar Elibaev jasady.
Osy ýaqytqa deıin bul ádis elimizde tek eresek adamdarǵa ǵana qoldanylyp kelgen. Al damyǵan Eýropa elderinde balalarǵa 2005 jyldan jasalyp keledi. Baýyr arterııasynyń hımıoembolızasııa ádisi (BAHE) – aǵzaǵa tıetin zaqymy barynsha az, ınvazıvti ádis. Bul arnaıy quraldarmen mıkrosferalarǵa júktelgen hımıoterapevtik preparat qan tamyrlary júıesi arqyly mıkrokateterlerdiń kómegimen baýyrdaǵy isikke tikeleı jetkizilip, hımıoterapııalyq jáne ıshemııalyq áser etýmen isikti tikeleı joıýǵa múmkindik beredi.
«Pedıatrııalyq tájirıbege halyqaralyq standarttarǵa sáıkes engizilgen bul ádistiń artyqshylyǵy – basqa organdardy zaqymdamaı, isikti tikeleı joıa alady jáne aýyr asqynýlardyń aldyn alyp, qaıǵyly oqıǵalardyń kórsetkishin tómendetedi. Hımııalyq preparat baýyrda shoǵyrlanǵan isikke tikeleı engiziletindikten, hımıoterapııalyq áseri júıeli ádiske qaraǵanda birneshe ese tıimdi. Naýqastyń ózine ózi keletin kezeńi bar bolǵany 2-3 kúndi alady jáne pasıent prosedýradan keıin 3-kúni shyǵarylady. Bul ádisti qoldaný arqyly hırýrgııalyq operasııa jasaýǵa kelmeıtin baýyr isikteriniń kólemin turaqtandyrýǵa nemese azaıtýǵa bolady», deıdi Pedıatrııa jáne balalar hırýrgııasy ǵylymı ortalyǵynyń rentgenhırýrgy, balalar ıntervensııalyq kardıology Azız Ońlasynov.
Jyl saıyn Qazaqstanda orta eseppen balalarda qaterli isikterdiń 600-ge jýyq jańa jaǵdaıy anyqtalady. Gepatoblastoma balalardaǵy barlyq isiktiń shamamen 0,5-2% jáne baýyrdyń birinshilik isikteriniń 2/3 bóligin quraıdy. 2013 jyldan beri Pedıatrııa jáne balalar hırýrgııasy ǵylymı ortalyǵynda gepatoblastomaǵa shaldyqqan 69 bala emdelgen. Onyń 40-y – remıssııada.
«Baýyr arterııasynyń hımıoembolızasııa ádisi operasııa jasaýǵa kelmeıtin qaterli isikterdi emdeýdiń tańdaý ádisi retinde qarastyrýǵa múmkindik beredi. Baýyr isikterin emdeýde hımıoembolızasııany qoldanýdyń tıimdiligi men múmkindiginiń kepili – táýekel tobyndaǵy naýqastarda osy qaterli dertti múmkindiginshe erte dıagnostıkalaýǵa, sondaı-aq ıntervensııalyq onkologııalyq ádisterdi qoldaný arqyly der kezinde em-dom júrgizýge jol ashady», deıdi balalar onkohırýrgy, rentgenhırýrg Begaıdar Elibaev.