Qoǵamnyń barlyq salasyn sıfrlandyrý – eń aldymen, jumystyń jedeldigin qamtamasyz etip, qyzmet kórsetý sapasyn arttyrsa, ekinshi jaǵynan adam faktorynyń aldyn alady. Nátıjesinde, sybaılas jemqorlyq sekildi jaısyz kórinisterdi boldyrmaýǵa septigin tıgizedi. Osy oraıda ýaqyt talabyna oraı qorǵanys salasynda da bul úrdis qarqyndy qolǵa alynyp jatyr.
Qorǵanys mınıstriniń orynbasary Darhan Ahmedıevtiń aıtýynsha, «Invisible Government», ıaǵnı «Kórinbeıtin memleket» jobasy sheńberinde mınıstrlik elimizdiń Qarýly Kúshterimen baılanysty barlyq qyzmetti proaktıvti túrde kórsetip, iske asyrýdy qolǵa alǵan. Sonyń bir mysaly – 18 jasqa tolǵan bozbalalardy dástúrli formatta áskerge shaqyrý toqtatylyp, elimizdiń barlyq óńirinde shaqyrý ýchaskelerinde tirkeý proaktıvti formatta júrgizilmek. El Úkimeti Qorǵanys mınıstrliginiń bul bastamasyn qoldady.
– Keler jyldyń 1 qańtarynan bastap elimizdiń barlyq óńirinde tirkeý naýqanyn ótkizý proaktıvti formatta júzege asyrylatyn bolady. Endi azamattarymyz medısınalyq kýálandyrýdan ótý, jeke isterge qujattar jınaý úshin áskerı komıssarıatqa arnaıy kelip júrmeıdi. Bul oqýshylardyń sabaqtan qalmaýyna múmkindik beredi. Sonymen qatar jyl saıyn jergilikti atqarýshy organdar bóletin 1 mlrd teńgeden astam qarajatty únemdep, shaqyrý ýchaskelerine tirkelý týraly kýálikterdi alý qajetin joıady, – dedi ol.
Qorǵanys mınıstriniń orynbasary azamattardy áskerge shaqyrý týraly SMS-habarlamanyń zańdylyǵy jáne áskerge shaqyrý ýchaskesine kelý qajettigi týraly kelip túsken suraqtaryna baılanysty habarlama 1414 qyzmeti arqyly júzege asyrylatynyn jáne onyń qosymsha shara ekenin aıtady.
Buǵan deıin kóterilip kele jatqan mańyzdy bastamalardyń biri – merzimdi áskerı qyzmetke shaqyrylǵan azamattarǵa ýaqytsha nesıelik demalys berý máselesi. Qorǵanys mınıstrliginiń málimetinshe, bıyl áskerı qyzmettiń bedeli men tartymdylyǵyn arttyrý maqsatynda Qarjy naryǵyn retteý jáne damytý agenttigimen birlesip, merzimdi áskerı qyzmetshilerge banktik qaryzdar men mıkronesıeler boıynsha tólemderdi keıinge qaldyrý máselesi óz sheshimin tapqan. Nátıjesinde, merzimdi áskerı qyzmetke shaqyrylǵan 2 600-dan astam azamattyń nesıe boıynsha tólemderi keıinge qaldyryldy.
– Bul joba uzaq merzimdik sıpatqa ıe bolǵandyqtan, aldaǵy ýaqytta azamattyń ótinishinsiz proaktıvti formatta nesıelik demalys berý algorıtmi ázirlendi. Bul nesıelik mindettemeler boıynsha tólemderdi keıinge shegerýdi neǵurlym jedel usynýǵa jáne merzimdi áskerı qyzmettegi azamattardy 100% qamtýǵa múmkindik beredi, – dedi Qorǵanys mınıstriniń orynbasary Darhan Ahmedıev. Onyń aıtýynsha, bul algorıtm qazirgi kúni damý satysynda.
Mınıstrlik ókili azamattardy kelisimshart negizinde áskerı qyzmetke qabyldaý boıynsha «Jauynger.kz» servısi synaqtan ótip jatqanyn aıtty. Qyzmettegi «ashyqtyqty» jáne «qoljetimdilikti» qamtamasyz etý, sondaı-aq sybaılas jemqorlyq táýekelderin barynsha azaıtý úshin ázirlengen servıstiń artyqshylyǵy – aqparattyq júıelermen ózara ıntegrasııalyq is-qımyldyń arqasynda vedomstvoishilik jáne vedomstvoaralyq qujat aınalymy avtomattandyrylmaq. Sol arqyly memlekettik organdardan onlaın rejimde shynaıy aqparat alý áskerı qyzmetke kirý merzimin 3-4 aıdan 15-30 kúnge deıin qysqartady. Bul jaǵdaıda adam faktory jáne onyń sheshim qabyldaýǵa áseri bolmasy anyq.
Derekter bazasyn ıntegrasııalaý el ishinde turǵylyqty jeriniń ózgerýine baılanysty áskerı komıssarıatqa kelý qajettigin joıady. Vedomstvo ókiliniń aqparaty boıynsha azamattardy áskerı esepten shyǵarý jáne qoıý tirkelgen mekenjaıy boıynsha avtomatty túrde júzege asyrylady.
– Áskerde bolmaǵan azamattarǵa áskerı bılet alý qajettigi bolmaıdy. Bul shara sybaılas jemqorlyq táýekelderin aıtarlyqtaı tómendetip, bıýdjet qarajatyn únemdeıdi. Mundaı jańashyldyqtar zań turǵysynan bekitý satysynda tur, – dedi mınıstrdiń orynbasary.
Sońǵy ýaqytta kóp kóterilip júrgen máselelerdiń taǵy biri – áskerdegi álimjettik jáne sýısıd jasaý jaǵdaılary. Osynda keleńsiz oqıǵalardyń aldyn alý úshin Qarýly Kúshterde «Aq suńqar» ámbebap psıhodıagnostıkalyq kesheni qoldanyla bastady. Ol psıhologııalyq turaqsyzdyǵy, sýısıdke beıimi bolýy múmkin adamdardy ýaqtyly anyqtaýǵa arnalǵan. Dıagnostıkanyń 60-tan astam quraly bar atalǵan keshen avtomatty rejimde psıhologııalyq zertteý nátıjesin bermek.
– Merzimdi qyzmet sarbazdarynyń kúndelikti qyzmetin jalpy baqylaý úshin Qarýly Kúshter oryndarynda 50 myńǵa jýyq beınebaqylaý kamerasy ornatylǵan. Beıneanalıtıkanyń zamanaýı tehnologııalary materıaldyń aýqymdy kólemin óńdeýge múmkindik beredi. Osyǵan baılanysty mınıstrlik tarapynan beıneanalıtıka júıesi engizilip jatyr. Bul quqyq buzýshylyqtardy, jarǵylyq emes qatynastardy ýaqytynda toqtatýǵa, óz-ózine qol jumsaý áreketterin boldyrmaýǵa múmkindik beredi. Atalǵan júıe kamera materıaldaryn taldaıdy jáne joǵaryda aıtylǵandaı, oqıǵalar anyqtalǵan jaǵdaıda jedel shara qabyldanady, – deıdi mınıstr orynbasary Darhan Ahmedıev.
Budan ózge Qorǵanys mınıstrligi egov portalyndaǵy jeke kabınetke uqsas «áskerı qyzmetshiniń kabıneti» modýlin ázirledi. Bul – naqty ýaqyt rejiminde áskerı qyzmetshige qatysty málimetterdi kórýge, qajetti anyqtamalar alýǵa jáne baıanattar berýge múmkindik usynady. Bul qyzmet túri qaǵaz qujat aınalymyn edáýir qysqartyp, artyq bıýrokratııalyq rásimderdi boldyrmaıdy.