Tárbıedegi olqylyq saldary

Shilde aıynyń sońǵy on­kún­diginde bolǵan oqıǵa áleý­mettik jelini dúr silkin­di­rip, estip-bilgen jurt­tyń ja­ǵasyn ustatty. Jas sha­ma­la­ry 12-17 jastaǵy bir top bala óz qatarlasyn aıaýsyz uryp, tepkiniń astyna alǵan. Jas­óspirimniń bas súıegine, denesine jaraqat salyp, oılaryna kelgen jaýyzdyqty júzege asyrǵandar arasynda kámelet jasyna jetpegen qyzdar da bolǵan desedi oqı­ǵany kórgender. Jabyla saba­ǵany bylaı tursyn, zardap shegýshini tyr jalańash sheshindirip, qorlap, onysyn uıaly telefon kamerasyna tú­sirip alǵan. Eń sońy beı­bastaq qylyq jasaǵandar baladan 100 myń teńge talap etip, bopsalaǵan. Baıǵus balany sońynan dostary taýyp alyp, jedel járdem kóligin shaqyrtqan.

Bul oqıǵaǵa jergilikti ata-analar aıryqsha alańdaýshylyq tanytyp otyr. Áleýmettik jeli­lerde belsendi azamattar top quryp, ar-namysy tap­talǵan er balanyń quqy­ǵyn qorǵaý, qylmystyq oqı­­ǵaǵa qatysy barlardyń tıis­­ti jazasyn alýy boıynsha máselelerdi nazarlarynda us­taýda. О́ńirlik polısııa depar­tamentiniń málimetinshe, uryp-soǵý áreketine qatys­qannyń barlyǵy anyq­ta­lyp­ty. «Oqıǵanyń barlyq qatysýshysy anyqtaldy. Qa­zirgi ýaqytta Qylmystyq ko­dekstiń 107-baby 4-bóliginiń 2-tarmaǵy – «Aldyn ala sóz baılasý arqyly adamdar to­bynyń densaýlyqqa qasaqana aýyrlyǵy ortasha zııan keltirýi» boıynsha sotqa deıingi tergeý júrgizilip jatyr», dep habarlandy departamentten.

Oblystyq balalar aýrý­ha­na­synyń neırohırýrgi Talǵat Qasymbekovtiń aıtýynsha, 2009 jyly týǵan jasóspirim emdeý mekemesine jetkizilgende, oǵan «jabyq bas súıek-mı jaraqaty» dıagnozy qoıylǵan. Iаǵnı balanyń mıy shaıqalyp, mańdaı súıegi synǵan, ókpe jáne búırek músheleri qatty soqqy alǵan. Bet-aýzy, shyntaqtary men arqasy, keýdesi syrylǵan. Zardap shegýshi tolyq saýyǵyp ketýi úshin oǵan keminde úsh aılyq ońaltý sharalary jáne psıhologtiń kómegi qajet deıdi maman.

– Soqqyǵa jyǵylǵan bala­nyń jaǵdaıy ortasha aýyr dep baǵalandy. Alǵashqy kúnnen-aq konservatıvti emdeý sharalary taǵaıyndalyp, dáriger mamandarymyz jasóspirimge óz aqyl-keńesterin berdi. Balaǵa eshqandaı ota jasalǵan joq. Qazirgi ýaqytta jaǵdaıy jaqsy, jýyq arada ambýlatorlyq emdeýge shyǵarylady. Psıho­lo­gııalyq jaraqat balanyń boıynda uzaq ýaqytqa qalyp qoıa­tyny aqıqat. Ol endi tur­ǵy­lyqty jeri boıynsha qyz­met kórsetetin nevropatolog­ter men psıhologterdiń quzy­re­tindegi jumys. Balamen ári qaraı ońaltý sharalaryn júrgizý óte mańyzdy, – deıdi ob­lystyq balalar aýrý­­ha­­na­synyń neırohırýrgi T.Qasymbekov.

Emdeý mekemesiniń qyzmet­ker­leri bala aýrýhanaǵa tús­kennen bastap ata-anasy múlde boı kórsetpegenin de jasyrmady. Anasy kelmek túgili, áli kúnge balasyna qońyraý shalyp, halin de suramaǵan. Dárigerler jasóspirimniń zańdy ókilderi kelmeıinshe, ony aýrýhanadan shyǵara almaıtyndaryn aıtyp otyr.

Al Oqý-aǵartý mınıstr­li­giniń Balalardyń quqyqtaryn qorǵaý komıteti jasóspirimdi uryp-soǵý oqıǵasyn óz baqy­laýyna alǵanyn, oǵan al­daǵy ýaqytta jan-jaqty kó­mek kórsetiletinin habarlady. «Balalar arasyndaǵy qa­ty­gezdiktiń aldyn alý maq­satynda óńirlerge bilim berý uıymdarynda tárbıe jumys­ta­ryn kúsheıtip, balalardy qosymsha bilimmen 100 pa­ıyz qamtý jóninde sharalar qabyldaý tapsyryldy» de­lingen resmı málimdemede.