Búgin Astana qalasyndaǵy «Qazanat» ıppodromynda báıgeden Qazaqstan Respýblıkasynyń 5-shi irikteý týry ótti, dep habarlaıdy Egemen.kz.
Chempıonatty QR Ulttyq sport Qaýymdastyǵy men respýblıkalyq «Báıge» federasııasy uıymdastyrdy.
Jarysty tamashalaýǵa QR Aqparat jáne qoǵamdyq damý mınıstri Darhan Qydyráli, QR Ulttyq sport Qaýymdastyǵynyń prezıdenti Islambek Saljanov pen respýblıkalyq «Báıge» federasııasynyń prezıdenti Qanat Kópbaev arnaıy keldi.
Alaman dodanyń ashylýynda sóz alǵan QR Aqparat jáne qoǵamdyq damý mınıstri Darhan Qydyráli sońǵy ýaqytta elimizde ulttyq sport túrleriniń tanymdylyǵy artqanyn aıtyp, jarys jeńimpazdaryn quttyqtady.
«Biz jelmen jarysqan, jylqynyń jalynda ósken jurttyń jurnaǵymyz. Sondyqtan jylqy dese, báıge dese bárimizdiń delebemiz qozyp otyrady. Jylqy bizge qanat baılaıdy, at – bizdiń rýhymyz. Sol rýhqa qyzmet jasap júrgen QR Ulttyq sport qaýymdastyǵy men respýblıkalyq «Báıge» federasııasynyń basshylaryna óz rızashylyǵymdy bildiremin! Qazaqtyń rýhy árdaıym bıik bolsyn! Búgingi báıgeniń jeńimpazdaryn shyn júrekten quttyqtaımyn», dedi Darhan Qýandyquly.
Saltanatty sharada sóz sóılegen QR Ulttyq sport qaýymdastyǵynyń prezıdenti Islambek Saljanov jarystyń mańyzdylyǵyn tilge tıek etti.
«Ulttyq sporttyń artynda ulttyń rýhy, ulttyń namysy, tarıhy, mádenıeti men dástúri tur. Memleket basshysy Qasym-Jomart Kemeluly Toqaevtyń tikeleı qoldaýymen sońǵy jyldary elimizde ulttyq sport túrleri qarqyndy damyp keledi. Búgingi bizdiń jarysymyzdy tamashalaýǵa arnaıy kelgen QR Aqparat jáne qoǵamdyq damý mınıstri Darhan Qýandyqulyna alǵys aıtamyn.
Barshańyzǵa belgili, qazirgi tańda biz elimizdiń barlyq óńirlerinde báıgeden jarystardy uıymdastyryp júrmiz. Osynaý jaýapty ári ıgi jumystardyń basynda bolyp, barlyq jarystardyń joǵary deńgeıde ótýine at salysyp júrgen respýblıkalyq «Báıge» federasııasynyń prezıdenti Qanat Shoqanulyna da rızashylyǵymdy bildirgim keledi!
Kelesi jyly elimizde besinshi Dúnıejúzilik kóshpendiler oıyndary ótedi. Bul biz úshin de, elimiz úshin de – mańyzdy joba.
Bul shara barysynda jarystardyń kóptep ótýi ulttyq sportymyzdyń damýyna zor paıdasyn tıgizedi.
Odan bólek te, aldaǵy ýaqytta biz iri-iri dodalardy uıymdastyratyn bolamyz.
Osylaısha ulttyq sportymyzdy bolashaqta álemge tanytsaq deımiz», dedi Islambek Tóleýbaıuly.
Respýblıkalyq «Báıge» federasııasynyń prezıdenti Qanat Kópbaev sońǵy ýaqytta báıge sportynan ótetin jarystarǵa keletin kórermender sany artyp jatqanyn qýana jetkizdi.
«Biz elimizdiń óńirlerinde báıge sportynan jarystardy turaqty túrde ótkizip kelemiz. Maqsatymyz – ulttyq sportymyz báıgeniń tanymdylyǵyn arttyryp, mártebesin ósirý. Bir qýanarlyǵy, kún sanap báıgege qyzyǵýshylyq tanytyp jatqan kórermender qarasy kóbeıýde. Bul bizdiń durys baǵytta jumys istep jatqandyǵymyzdyń kórsetkishi», dedi Qanat Shoqanuly.
Týrnırge elimizdiń birneshe óńirinen 80 jýyq tulpar qatysyp, «Qunan báıge», «Top báıge», «Jorǵa jarys», «Alaman báıge» boıynsha saıysqa tústi. Jarystyń júlde qory – 23 500 000 teńgeni qurady.
Jarys nátıjelerine keler bolsaq:
«Qunan báıge» 10 shaqyrym:
1-oryn Aldııar Ýaıshan «Lazer» esimdi tulpary;
2-oryn Aslanbek Abdyqal «Qaraqat» esimdi tulpary;
3-oryn Nurmuqash Dilnur «Mamlıýk» esimdi tulpary.
«Top báıge» 16 shaqyrym:
1-oryn Ámir Serik «Moı mır» esimdi tulpary;
2-oryn Aslanbek Abdyqal «Abyraı» esimdi tulpary;
3-oryn Bekzat Dildáhan «Sakýra» esimdi tulpary.
«Jorǵa jarysy» 9 shaqyrym:
1-oryn Jan Qoqanbaev «Salkúreń» esimdi tulpary;
2-oryn Álııa Asqarova «Mesıas maı» esimdi tulpary;
3-oryn Shýaq Jaılaýbek «Juldyz» esimdi tulpary.
«Alaman báıge» 23 shaqyrym:
1-oryn Bekzat Dildáhan «Talhız» esimdi tulpary;
2-oryn Arnat Murathan «Semser» esimdi tulpary;
3-oryn Arnur Samatuly «Samal» esimdi tulpary.
Aıta keteıik, jarys uıymdastyrýshylary 4-shi jáne 5-shi oryn alǵan shabandozdardy da aqshalaı syılyqpen marapattady.
Odan bólek, jarys barysynda kórermender ulttyq kıim baıqaýyn tamashalady. Bul saıystyń jeńimpazdaryna uıymdastyrýshylar jalpy kólemi 1 mıllıon teńge syıaqyny tabystady.