Bıyl Mádenıet jáne sport mınıstrligi tarapynan tuńǵysh ret jarııalanyp otyrǵan jas aqyndar men jazýshylarǵa beriletin arnaýly ádebı syılyqqa ótinim qabyldaý aıaqtaldy. Ádebı syılyq 18-35 jas aralyǵyndaǵy qalamgerlerge arnalǵan. Baıqaýǵa barlyǵy 53 úmitkerdiń qujaty qabyldandy. Olardyń ishinde «Balalar ádebıeti» – 17, «Dramatýrgııa» – 9, «Poezııa – 13» jáne 14 qatysýshy «Proza» atalymdary boıynsha ótinim berdi.
Qazirgi tańda barlyq shyǵarmalar saraptamanyń birinshi kezeńinde, ıaǵnı ádebı syılyqtyń sarapshylar komıssııasyna usynyldy. Sarapshylardyń qaraýyna týyndylar avtory jasyrylyp, shıfr boıynsha taratyldy.
Saraptamanyń ekinshi kezeńi tamyz aıynyń ekinshi jartysyna josparlanyp otyr. Ádebı syılyq negizgi 4 atalym boıynsha úzdikterdi anyqtaıdy. Ár atalymda jeńimpazǵa 4 mln teńge syıaqy jáne «Arnaýly ádebı syılyqtyń laýreaty» ataǵy, dıplom jáne tósbelgi beriledi.
Jeńimpazdardy marapattaý jyl sońyna josparlanǵan.
«Jas qalamgerlerdiń shyǵarmashylyǵyn qoldaý, yntalandyrý jáne nasıhattaý asa mańyzdy. Tuńǵysh ret uıymdastyrylyp otyrǵan syılyqty elimizdiń rýhanı ortasy jyly qabyldady. Salystyrmaly turǵyda basqa atalymdarǵa qaraǵanda «Balalar ádebıeti» baǵytyna kóbirek shyǵarma túskeni negizgi maqsattarymyzdyń birine qol jetkizgenimiz deýge bolady. Búgin jas qalamgerlerge jasalǵan qoldaý, erteń úlken jazýshylardyń qalyptasýyna septigin tıgizetini anyq», dedi MSM Arhıv, qujattama jáne kitap isi komıteti Kitap isi basqarmasynyń basshysy Almaz Myrzahmet.