Temirtaýda jylý kózderi men jylý jelilerin aýqymdy rekonstrýksııalaý jumystary júrip jatyr. Buǵan deıin jazǵanymyzdaı, Metallýrgter qalasynda ótken jylytý maýsymy kezinde 400-ge jýyq apat oryn alǵan. Keńes kezinde ornatylǵan jylý qubyrlarynyń 70 paıyzy tozǵan. Qazir jylý qubyrlaryn jańartý júrip jatyr. Premer-mınıstrdiń birinshi orynbasary Roman Sklıar Qaraǵandy oblysyna jumys saparynda júrgizilip jatqan jumystardyń barysyn tekserdi.
«ArselorMıttal Temirtaý» AQ 2-JEO-synda jylý berý maýsymyna daıyndyq jáne jetinshi qazandyqtyń qurylysy týraly kásiporynnyń bas dırektory Vladımır Iаblonskıı baıandady. Onyń aıtýynsha, úsh qazandyq pen úsh týrbınaly generatordy jóndeý jumystary aıaqtalýǵa jaqyn. Buǵan qosa jetinshi qazandyqty salý boıynsha mańyzdy jobany iske asyrý keshiktirilýde. Sebepti jaýapty organ bylaı túsindiredi: nysanda jumysshylar jetpeı jatyr, negizgi jabdyqtar merziminen keshigip ornatylýda.
Merdiger kompanııa basshylyǵynyń («AB Construction» JShS) esebin tyńdaǵan R.Sklıar qurylys-montajdaý jumystaryn ýaqtyly aıaqtaý qajettigin belgilep, eskertý jasady.
R.Sklıarǵa jylý jelilerin jóndeý boıynsha baǵdarlama tanystyryldy. Qaladaǵy jylý jelileriniń barlyq tozǵan ýchaskesi boıynsha jańartylý jumystary júrip jatyr. R.Sklıar jaýaptylarǵa jumysty jedeldetý kerektigin, jylý berý maýsymyna deıin tolyq aıaqtaýdy qatty tapsyrdy.
Sonymen qatar Premer-mınıstrdiń birinshi orynbasary Qaraǵandy, Shahtınsk qalasynyń jáne Topar kentiniń jylytý qazandyqtaryn aralady.
«Topar» MAES basshylyǵy negizgi jáne qosalqy jabdyqtardy kúrdeli jáne qalypty jóndeý jumystary keste boıynsha júrip jatqanyn habarlady. «Búgingi tańda jóndeý jumystary 60 paıyzǵa oryndaldy. Jospardan keshikpeı kele jatyrmyz. Barlyq mindettemeni tolyq oryndaımyz», dedi «Topar»MAES operasııalyq dırektory Aleksandr Býzo.
Shahtınsk qalasynyń jylý jelileri Temirtaý sekildi 75 paıyzǵa tozyp tur. 10 jyl boıy esh energııa kózi kúrdeli jóndeý kórmegen. Bıyl úsh qazandyq pen eki týrbına jóndelip jatyr. R.Sklıar jaýaptylarǵa barlyq jumys ýaqytynda aıaqtalýy kerektigin, jedeldetý qajettigin qatań eskertti.
Oblys ortalyǵynda da osy baǵyttaǵy jumystar qyzý júrip jatyr. Aldaǵy jylý berý maýsymyna deıin 16 qazandyq pen 10 týrbına jóndelip jatyr. Mundaǵy jumystar keste boıynsha júrip jatyr. Bıylǵy jóndeý jumystaryna baǵyttalǵan qarjy kólemi 13 mlrd teńgeni quraıdy. Bul týraly birinshi vıse-premerge «Qaraǵandy Energoortalyq» kompanııasynyń basshylyǵy da baıandady. Ol oblys ortalyǵynyń tutynýshylaryn jylýmen jáne elektr energııasymen qamtamasyz etedi. Quramyna eki energııa kózi kiredi: 3-JEO jáne 1-JEO.
Sondaı-aq R.Sklıarǵa 3-jylytý qazandyǵynyń qurylys barysy týraly aıtyldy. Joba kezeń-kezeńmen júzege asyrylyp jatyr. Mundaǵy atalǵan jumys júıeli atqarylsa, jylýmen jabdyqtaý júıesin jaqsartýǵa jáne qalanyń jańa nysandaryn jylýmen qamtamasyz etýge múmkindik mol bolmaq.
Qasymhan ǴALYM,«Egemen Qazaqstan»