Memleket basshysy Qasym-Jomart Toqaev Pavlodar oblysyna jumys sapary barysynda Ekibastuz qalasynyń turǵyndarymen kezdesti, dep habarlaıdy Egemen.kz Aqorda baspasóz qyzmetine silteme jasap.
Qala turǵyndary úılerin jylýmen qamtamasyz etýdiń mán-jaıy týraly aıtyp berdi. Qasym-Jomart Toqaev byltyrǵy tótenshe jaǵdaı qaıtalanbaýy úshin Úkimet tarapynan barlyq qajetti sharalar qabyldanyp jatqanyn málimdedi.
Sonymen qatar turǵyndar memleket tarapynan kórsetilip jatqan qoldaý úshin alǵys aıtyp, Prezıdentten qalany abattandyrý jáne áleýmettik nysandar salý máselesin kóterdi. Atap aıtqanda, Ekibastuz qalalyq ardagerler keńesiniń tóraǵasy Samat Ramazanov «Shahter» saıabaǵyna kúrdeli jóndeý júrgizý qajet ekenin aıtty. Al kópbalaly ana Aıana Smaǵulova qalada balalardyń bos ýaqytyn tıimdi ótkizip, olardyń jan-jaqty damýyna arnalǵan Shyǵarmashylyq úıin salyp berýdi surady.
Memleket basshysy turǵyndardyń ótinishterin nazarǵa alyp, tıisti tapsyrma beretinin jetkizdi.
«Durys aıtasyz. Nazarǵa alamyz. Qysqa ýaqytta Shyǵarmashylyq úıin salamyz. Jalpy, bizge el kóleminde óskeleń urpaqtyń ıgiligi úshin nysandardy kóbirek salý kerek. Sportpen aınalysý kerek ekenin aıtyp júrmin ǵoı. Balalalardy sportqa baýlý kerek. Biraq ol úshin laıyqty sport alańdary, stadıondar qajet. Tipti, ondaı sport nysandar elorda da jetispeıdi. Sondyqtan ákimder bul máselemen mindetti túrde aınalysýy kerek», dedi Qasym-Jomart Toqaev.
Áńgimelesý barysynda Prezıdent qıyn-qystaý jaǵdaıda shydamdylyq tanytqany jáne apat saldaryn joıý kezinde azamattyq belsendilik kórsetkeni úshin ekibastuzdyqtarǵa alǵys aıtty.
«Ekibastuzǵa ahýaldy kórý úshin arnaıy kelip otyrmyn. О́tken qys ońaı bolǵan joq. Bárin kórdim, túsinemin. Degenmen bárimiz bir ult, bir el retinde aýyzbirshilik tanytýymyz kerek. Qala turǵyndary osy qıyn jaǵdaıda sabyrlyq tanytyp, shydady. Azamattyq pozısııasyn, kózqarasyn bildirdi. Sondyqtan barshańyzǵa rızashylyǵymdy bildiremin. Úkimetke tıisti tapsyrmalar berildi. Tıisti qarajat bólindi. Sondyqtan bári oıdaǵydaı bolady dep oılaımyn», dedi Prezıdent.