Bıyl mektep oqýshylarynyń jazǵy demalysy óńirdiń qaraǵaıly ormandy aýdandaryndaǵy tumsa tabıǵat aıasyna ornalasqan on shaqty lagerde uıymdastyrylǵan. Munyń syrtynda, ata-ana qamqorlyǵynan qaǵylǵan balǵyndar men erekshe balalarǵa arnalǵan úsh demalys orny jumys isteıdi. Bul lagerlerde jaz boıy tórt júzden astam bala tegin demalyp jatyr.
Taıaýda oblystyq bilim basqarmasy arnaıy baspasóz týryn uıymdastyryp, ata-analardy, jergilikti qoǵamdyq uıymdar men jýrnalısterdi jazǵy demalys lagerlerin aralap, ondaǵy balalardyń jaǵdaıyn bilip qaıtýǵa shaqyrǵan. Osylaısha, basqarma basshysynyń orynbasary Danagúl Súıindikova bastaǵan top áıgili «Sosnovyı bor» shıpajaıynyń irgesindegi general Bákirov atyndaǵy demalys ornyna, Altynsarın aýdanyndaǵy Bozbek aýylynyń mańyndaǵy orman ishine ornalasqan «Bolashaq» balalar saýyqtyrý lageri men Qostanaı aýdanyndaǵy «Altyngúl» balalar saýyqtyrý lagerinde bolyp qaıttyq.
«Altyngúl» lagerinde 7 jastan 15 jasqa deıingi erekshe balalar demalyp jatyr eken. Balaqaılar kúndelikti psıhologııalyq-pedagogıkalyq túzetý jáne ońaltý-damytý em-sharalaryn alyp otyr.
– Qazir lagerde úshinshi aýysymdaǵy 32 bala demalyp jatyr. Demalys ornynyń aýmaǵy – 7 gektar. Lager tolyqtaı beınekameramen jabdyqtalǵan. Bir aýysymda 50 balaǵa deıin qabyldaı alamyz. Ár topta 12 baladan bar. Olarǵa eki tárbıeshi jáne olardyń kómekshileri qaraıdy. Balalardyń qaýipsizdigin ár aýysymda kezekshilik etý arqyly eki ýchaskelik maman qamtamasyz etedi. Lagerdiń tórtinshi aýysymynda úıde oqıtyn balalar keledi dep josparlap otyrmyz. Balalar analarymen birge kelip demalatyn bolady. Ata-analar qalaǵan ýaqyttarynda kelip, balalarynyń jaǵdaıyn bile alady, – deıdi demalys kesheniniń dırektory Gúlshat Jumabaeva.
Oksana Stasıýk ekinshi jyl qatarynan «Altyngúl» lagerinde jumys istep keledi. Mamandyǵy – naýbaıshy: balalardyń kúndelikti jeıtin ystyq nanyn, tátti toqashyn pisirip beredi. Balǵyndar kúnine alty ýaqyt tamaqtanady. Taǵamnyń daıyndalý sapasy men azyq-túliktiń durys saqtalýyn dıetolog dáriger qadaǵalap otyrady. «Barlyǵyn qoldan pisiremiz. Balalarǵa bári unaıdy. Alǵystaryn aıtyp ketedi. Jalpy, bul salada júrgenime 10 jyldan asty», deıdi O.Stasıýk.
Altynsarın aýdanyna qarasty Bozbek aýylynyń mańyndaǵy «Bolashaq» balalar saýyqtyrý lagerinde bir aýysym ishinde Qostanaı, Aqtaý, Aqtóbe, Qaraǵandy, Aqmola oblystary men Astanadan kelgen 600-deı bala demalady.
Qazir munda oblystyq bilim basqarmasynyń baǵdarlamasy aıasynda balalar lagerleri arasyndaǵy óńirlik spartakıada ótip jatyr. Sporttyq is-sharaǵa «Chaıka», «Orlenok» balalar-saýyqtyrý lagerleri, general Bákirov atyndaǵy demalys orny men «Bolashaq» balalar saýyqtyrý lageriniń kishkentaı turǵyndary qatysyp jatyr. Balalar sporttyń toǵyzqumalaq, fýtbol, voleıbol syndy túrlerinen saıysqa túsedi. Aýmaǵy aınala qorshalǵan lagerdiń qaýipsizdigi 21 beınebaqylaý kamerasy arqyly kúzetiledi. Beısaýat júrgen beıtanys adamdardyń kirip ketpeýin kúzetshiler men eki polısııa qyzmetkeri qalt jibermeı qadaǵalap otyrady. Qazir bul lagerde besinshi aýysymdaǵy 480 bala demalyp jatyr. Lager basshysynyń aıtýyna qaraǵanda, munda jaz boıy uzyn sany úsh myń balaǵa deıin demalyp ketedi. Máselen, aqtóbelik Jánııa Aıbat esimdi balaqaı jazǵy demalys lagerine alǵash ret kelip otyr.
– 5-synypta oqımyn. Maǵan bári qatty unady. О́zime jańa dostar taptym. О́te kóńildi. Túrli oıyn-saýyq is-sharasy uıymdastyrylady. Tamaqtary da óte dámdi. Shilde aıynyń aıaǵynda kelgenmin. Kózdi ashyp-jumǵansha, ketetin kún de taıap qaldy, – deıdi Jánııa.
Al Derjavın qalasynyń turǵyny Ádemi Nazhan Tobyl óńirindegi balalar lagerine osymen úshinshi ret kelip otyr. «Jasym – on ekide. Tárbıeshilerimiz ben jetekshilerimizdiń bári meıirimdi, jaqsy adamdar. Keshke taman arnaıy bı keshi bolady. Ol jerde de qyzyqty baıqaýlar ótedi. Spartakıada aıasynda voleıbol jarysyna qatysyp jatyrmyn», deıdi eki beti bal-bul janǵan Ádemi.
Sapar sońynda qyzyq-qýanyshy kól-kósir jaıdary jazdyń jarqyn kúnderin taza aýa, tumsa tabıǵat aıasynda ótkizip jatqan balalardyń shat kúlkisin qımaı-qımaı qoshtastyq.