Kóktem Kókshege qarbalas ala keledi. Qyzyl sý júrip, ózen ańǵary seńge tolyp, lyqsı bulqynǵan, aqbas tolqyny aspanǵa atqan sátte ótkel izdegen jurttyń ókpesi qara qazandaı bolyp júreri bar.
Atbasar aýdanyndaǵy Qashqar ózeniniń jaǵasyn jaılaǵan qanshama aýyldyń birneshe jyldan beri kórgen kúni – osy. Bul másele bıyl ǵana týyndap, búgin ǵana aıtylyp otyrǵan joq. Qashqar ózeniniń ústine salynǵan, bul kúnde qııamettiń qylkópiri tárizdi bolyp turǵan kópir Esengeldi, Novomarınovka, Sepe, Sochınskoe aýyldaryna ortaq. Osy eldi mekenderdiń turǵyndary jalǵyz kópir arqyly qatynaıdy. Oblystyq mańyzǵa ıe Atbasar-Sochınskoe tasjolyn jalǵap jatqan kópir qaýsaǵaly – bes-alty jyl. Sodan beri tórt aýyldyń turǵyndary jyl saıyn kóktemde asaý ózennen óte almaı, ábigerge túsýde. Adam aıtqysyz qıynshylyq osy kezde týyndaıdy. Aýyl turǵyndary qarǵa adym jer uzap shyǵa almaıdy. Azyq-túligi taýsylyp, dári-dármek jetkizýdiń ózi qıyn. Mektep oqýshylary aýdan ortalyǵynda ótetin bilim saıysyna qalt-qult etken qaıyqpen qatynaıdy eken. Olar ózennen ótip bolǵansha ata-analary jaǵalaýda janyn shúberekke túıip, ımany qasym bolyp turady. Tirshilikke qajetti birinshi kezektegi taýarlardy tótenshe jaǵdaı qyzmeti qaıyqpen tasyp álek.
Qarjynyń joqtyǵynan emes, uzyn-yrǵasy 200 metrge jýyq kópirge 600 mln teńge qarajat bólingen. Qarjy bólingeli birneshe jyl ótse de, kópirdiń bitetin túri kórinbeıdi. Aýdan ákimdigi jol oblystyq mańyzdaǵy bolǵan soń bizdiń esh qatysymyz joq dep at-tonyn ala qashyp otyr.
– Tasjol oblystyq mańyzǵa ıe. Ondaǵy kópirdiń taǵdyry da oblystyq jolaýshylar kóligi jáne avtomobıl joldary basqarmasyna baılanysty, – deıdi aýdan ákiminiń baspasóz hatshysy Mıhaıl Maıer.
Basqarmanyń bergen málimetine qaraǵanda, Atbasar-Sochınskoe tasjolynyń 19-ynshy shaqyrymyndaǵy kópir qurylysy 2021 jyly bastalǵan eken. Alǵashqy meje boıynsha áldeqashan aıaqtalýǵa tıisti edi. Bastapqy joba boıynsha qurylys jumysynyń quny 600 mln teńge dep eseptelse kerek. Biraq bul joba 2018 jyly jasalǵan. Qurylys arada úsh jyl ótken soń baryp bastalǵan. Oǵan sheıin qajetti materıaldardyń quny kúrt qymbattap ketken. Máselen, osy ýaqyt aralyǵynda metall qurylǵylarynyń quny 107 paıyzǵa deıin ósken. Sál ǵana taratyp aıtsaq, sol kezde metaldyń ár tonnasy sol ýaqytta 212 462 myń teńge bolsa, qazirgi naryqtaǵy baǵasy – 465 myń teńge shamasynda. Demek, joba túzetilýi kerek. Osy arada bir aıta keter bazyna bar. Eger osy jumys ýaqytynda, tyńǵylyqty atqarylyp, júzege asyrylǵanda bıýdjettiń qyrýar qarjysy shyǵyn bolmaıtyn edi.
Basqarma basshysy Vladımır Kýlakovtyń aıtýyna qaraǵanda, kópir qurylysyn aıaqtaý 2004 jylǵa josparlanýda. Áli de saraptama jasalady. Jańa baǵa belgilenedi.
Bir kópirdiń jyry qanshama jyl boıy sozylyp keledi. «Jany ashymastyń janynda basyń aýyrmasyn» degendeı, taǵy da kóktem kelip, sý tasymaı ma? Qashqar ózeniniń boıyndaǵy qalyń el ótkel izdep ókpeleıtin boldy-aý.
Aqmola oblysy,
Atbasar aýdany