Kezekti matchtan keıin stadıondy tazalap ketetin japondyq jankúıerler esińizde me? Týra sondaı úrdis Oral qalasynda da bastaldy. Bastaǵan – 10 jasar Álıhan Nurzatuly.
Jaqynda «Aqjaıyq» pen «Jeńis» komandalary arasynda bolǵan oıynnan soń stadıon ishi ádettegideı gazet betteri men sýsyn qutylaryna tolyp qaldy. Bul kópshiliktiń kózi úırenip te ketken kórinis qoı. Biraq oıyn aıaqtalysymen qarshadaı bala qaltasynan arnaıy ala kelgen polıetılen qapshyǵyn shyǵaryp, aınalasyn tazalaı bastaǵan.
Bastamashyl balaqaıdyń esimi Álıhan eken. О́zi 10 jasta, «Jaıyq jastary» komandasynda jattyǵyp júrgen jas fýtbolshy bolyp shyqty.
– Men jalǵyz emespin, janymda Mansur, Nurtas jáne Nádir degen dostarym bar. Bárimiz kelisip jasadyq. Olar jınalǵan qoqysty jáshikke salýǵa alyp ketti, – dedi Álıhan.
«Aqjaıyq» komandasy men óńirdiń sport salasy basshylary Álıhan men dostaryna Oralda ótetin kelesi match kezinde syılyq jasaýdy josparlap otyr.
Batys Qazaqstan oblysy