Aqtóbe oblysyna jumys sapary barysynda QR Premer-mınıstri Álıhan Smaıylov Hromtaý aýdanynda ashylǵan Dóń taý-ken baıytý kombınatynyń shlamdaryn óńdeýmen aınalysatyn «Qazhrom» TUK» AQ biregeı baıytý fabrıkasynyń jumysymen tanysty, dep habarlaıdy Egemen.kz Úkimettiń baspasóz qyzmetine silteme jasap.
Jyl saıyn hrom kenin maıdalaý prosesinde Dóń taý-ken baıytý kombınatynda shamamen 900 myń tonna shlam jınalady. Qazirgi ýaqytta jalpy kólemi 14,5 mln tonnany quraıtyn onyń quramynda 35%-ǵa deıin hrom oksıdi bar. Ozyq standarttar boıynsha tehnologııalyq jáne avtomattandyrylǵan baıytý fabrıkasy shlamdardan gravıtasııalyq ádispen hrom oksıdin alýǵa múmkindik beredi. Alynǵan taýar konsentratynda kem degende 48,5% hrom oksıdi bolady. Jalpy jańa kásiporyn jumys istep turǵan óndiristerdiń qaldyqtaryn jáne burynnan jınalyp kelgen shlamdy jylyna shamamen 1,7 mln tonna kóleminde qaıta óńdep otyrýǵa múmkindik beredi.
Aqtóbe oblysynyń ákimi Eraly Toǵjanovtyń aıtýynsha, zaýyt – óndiristiń tıimdiligin arttyrýǵa jáne óńirdiń ekologııalyq ál-aýqatyn jaqsartýǵa baǵyttalǵan burynnan jınalǵan shlamdardy qaıta óńdeý jónindegi aýqymdy baǵdarlamanyń negizgi jobalarynyń biri.
Sonymen qatar Premer-mınıstr zaýyttyń jergilikti ekologııany jaqsarýǵa aıtarlyqtaı úles qosatynyn atap ótti.
«Bul jobanyń mańyzy zor. Eń bastysy – qaıta óńdeýden keıin qaldyqtardyń qoımalaryn qorshaǵan ortaǵa jáne halyqtyń densaýlyǵyna zııan keltirmeıtindeı etip, barlyq ekologııalyq standartqa sáıkes qalpyna keltirý qajet. Úkimet osy jáne basqa da shıkizatty qaıta óńdeý jobalaryna jan-jaqty qoldaý kórsetetin bolady», dedi Álıhan Smaıylov.