Sınoptıkter 12-14 tamyzǵa arnalǵan aýa raıy boljamyn usyndy, dep habarlaıdy Egemen.kz.
Sınoptıkterdiń boljaýynsha, respýblıkamyzdyń basym bóliginde aýa temperatýrasy tómendep, jańbyr jaýady. Ońtústik sıklonnyń áseri men atmosferalyq frontaldy bólimderdiń ótýimen eldiń basym bóliginde turaqsyz aýa raıy kútiledi, elimizdiń soltústiginde, shyǵysynda jáne ortalyǵynda jańbyr, keı ýaqyttarda qatty jańbyr jaýyp, naızaǵaı, burshaq, 15-28 m/s deıin ekpindi jel kútiledi. Naızaǵaı kezinde daýyldy jel bolýy yqtımal.
«Elimizdiń soltústik-batysynda, soltústiginde, ortalyǵynda túngi jáne tańerteńgi saǵattarda tuman kútiledi. Qazaqstannyń batysynda, soltústik-batysynda jáne ońtústiginde jaýyn-shashynsyz, joǵary temperatýramen ashyq aýa raıy saqtalady, 12-13 tamyzda Atyraý oblysynyń ońtústik-batysynda áli de óte qatty ystyq bolady», dep habarlady mamandar.
Sınoptıkterdiń aıtýynsha, soltústik, shyǵys jáne ortalyq óńirlerde salqyn bolady, aýa temperatýrasy kúndiz 12-20 gradýsqa deıin, al ońtústik-shyǵysta 20-28 gradýsqa deıin tómendeıdi.