Bata – tálim-tárbıelik máni aıryqsha, urpaqtan-urpaqqa úlgi bolyp kele jatqan mura. Al osyndaı qundy murany saqtap, ózgelerge dáripteý urpaq tárbıesinde óte mańyzdy. Osy rette oblystyq ardagerler uıymynyń uıymdastyrýymen Taldyqorǵandaǵy Ardagerler úıinde «Batamen el kógerer» baıqaýy ótti.
Taǵylymy mol sharaǵa dýaly aýyz, shejirekeýde qarııalar qatysyp, óskeleń urpaqqa ónege kórsetti. Aqyl dodasyna oblys qalalary men aýdandarynyń aqylgóı qarııalary qatysyp, jurtshylyq aldynda berip júrgen batalaryn jalpy kópshilik pen ádilqazylar alqasynyń sarabyna saldy.
San ǵasyrlar ótse de, qazaq halqynyń ózgerissiz, salty bolyp qalyptasqan dástúriniń biri – bata berý. Búginde halqymyzdyń osynaý taǵylymdy dástúri qaıta jańǵyryp, jańarý ústinde. Ardagerler úıinde ótken shara osy tujyrymymyzdyń jarqyn bir dáleli ispetti.
Áıgili Tóle bıden bala kezinde bata alǵan Eskeldi áýlıe ýaqyt óte kele aýzyna qalyń el qaraǵan dara da dana tulǵaǵa aınaldy. Osynaý jan tolqytar kórinispen ashylǵan baıqaýda oblystyq ardagerler uıymynyń tóraǵasy Ermek Kelemseıit sóz sóılep, batagóı qarııalarǵa sáttilik tiledi.
El men jerge, el mereıin kóterer erlerge, jelkildep ósip kele jatqan jas urpaqqa aq tilekter aǵytylǵan baıqaýdyń alǵashqy kezeńinde qazynaly qarttar ózderi daıyndap ákelgen batalaryn ádilqazylar alqasynyń sarabyna salsa, ekinshi kezekte jerebe boıynsha belgilengen taqyrypqa bata berdi. Tusaýkesý men as batasy, sapar men Naýryz batasy tárizdi taqyryptarǵa berilgen batalar qarııalardyń básekege qanshalyqty daıyndalyp kelgendikterin, ıaǵnı jalpy ómir tájirıbeleriniń de moldyǵyn baıqatty. Áıtse de «Júırikten júırik ozar jarysqanda» degendeı, túptep kelgende baǵy men baby birdeı shapqan qarataldyq qarııa Seıfolla Erjanuly 1-orynǵa laıyq dep tanyldy. Júldeli ekinshi, úshinshi oryndardy taldyqorǵandyq Qýanysh Kúnbolatov pen alakóldik Ádilǵazy Núsipov aqsaqaldar ózara bólisti. О́zge qatysýshylarǵa yntalandyrý syılyǵy berildi.
Baıqaý sońynda ádilqazylar alqasynyń tóraǵasy Ámire Árin sóz alyp, taǵylymy mol sharanyń ótýi men mańyzy jaıynda aıtyp ótti. Odan keıin oblysymyzdyń túkpir-túkpirinen at terletip kelgen qarııalar aq dastarqan basynda shúıirkelesip, ulaǵaty mol áńgime órbitti.
Jetisý oblysy