Qurylysshylar qoltańbasy

Máselen, Atyraý oblysynda 2000 jyldan beri qurylys ındýs­trııasy qarqyn alyp otyr. Mu­naıly shaharda birneshe sha­ǵyn aýdanda turǵyn úı boı túzedi. Tek oblys ortalyǵy ǵana emes, aýdandar men shalǵaıdaǵy aýyldarda da mektepter, máde­nıet úıleri men medısına nysandary kóptep paıdalanýǵa berilip keledi.

Atyraý oblysy ákiminiń oryn­basary Jasulan Bısem­bıev­tiń aıtýynsha, 2025 jylǵa deıin 35 densaýlyq saqtaý nysanyn salý jospary bar. Onyń ishinde osy jyldyń sońyna deıin 10 medısınalyq nysandy paı­dalanýǵa berý kózdelip otyr.

«Qurmanǵazy aýdanyndaǵy Altynshy, Shaǵyrly, Jastalap, Eginqudyq aýyldarynda medı­sı­nalyq nysandy salýǵa da­ıyn­dyq bastaldy. Qazir arnaıy bólingen ýchaskelerde topyraq tógý jumystary júrip jatyr. Al Mahambet aýdanynyń Tal­dy­kól aýylyndaǵy tozyǵy jetken dárigerlik ambýlatorııa ǵı­­maratyn buzý qolǵa alyndy. Ornyna zamanaýı ǵımarat sa­ly­­nady. Turǵyndar Isataı aýda­nyn­yń ortalyǵy Aqqystaý aýy­lynda feldsherlik-aký­sher­lik pýnkt, Jylyoı aýdanynda or­ta­lyq aýrýhana, Atyraý qa­la­­­synyń mańyndaǵy Bereke, Damby aýyldarynda dárigerlik ambý­latorııanyń ıgiligin kóre bastaıdy», deıdi J.Bısembıev.

Ákim orynbasarynyń dere­gi­ne súıensek, kelesi jyly dál osyndaı 25 nysannyń qury­lysy aıaqtalady. Jańa nysan­dar­ arasynda 7 medısınalyq pýnkt, 6 dárigerlik ambýlatorııa, 5 feldsherlik-akýsherlik pýnkt bar. Atyraý qalasynda úsh qo­sa­l­qy pýnkti bar jedel medı­sı­­nalyq járdem stansasy úshin jańa ǵı­marat boı kóteredi.

Sonymen qatar bıyl 7 mektep pen 1 japsarjaıdyń qurylysyn aıaqtaý josparlanǵan. Sóıtip, jalpy sany 6 450 orynǵa shaqtalǵan jańa mektepter oqýshylardy qa­byldaıdy. Qoldanysqa beri­le­tin jańa mektepterdiń beseýi Atyraý qalasynyń aýmaǵynda ornalasqan. Naqtylaı aıtqan­da, Nursaıa, Saryarqa shaǵyn aýdandaryndaǵy Binom mektep­te­ri, Maǵjan Jumabaev atyn­da­ǵy mekteptiń jańa ǵıma­ra­ty, Jańatalap jáne Aqjar aýylynda, Mahambet aýdanynda qu­rylysy aıaqtalatyn bilim ordasy, Isataı aýdanynyń Tushy­qu­dyq aýylyndaǵy mekteptiń japsarjaıy paıdalanýǵa tapsyrylady. Al kelesi jyly 18 mektepti paıdalanýǵa berý jos­parlanyp otyr. Onyń ishinde 9 bilim ordasy «Jaıly mektep» baǵ­darlamasymen salynady.

Mine, osyndaı áleýmettik ma­ńyzy zor nysandardyń bárinde qurylysshylardyń mańdaı teri, qurysh qolynyń qoltańbasy, bir sózben aıtqanda, qajyrly eńbegi bary daýsyz. Bir qaraǵanda aq qaǵazǵa jobasy syzylǵan túrli ǵımarattyń irgetasyn quıyp, tasyn qalaý, sylap-syrlaý ońaı kórinýi múmkin. Biraq óz isine jaýapkershilikpen qaraıtyn qu­ry­lysshylar úshin olaı emes. Ár istiń óz qıyndyǵy bolatyny sekildi, ǵımaratty turǵyzýda jobadan aýytqymaý qajet. Sol sebepten tas qalaýshylar da, sy­laqshylar da ár kúngi isi­niń nátıjesine eki shuqyp, bir qa­raı­dy.

Máselen, «Taraz­Qu­rylys­In­vest» JShS bas dırektory Nurbola Ábdirasylovtyń aıtýyn­sha, byl­tyrdan beri Aty­­raý qa­lasynyń «Birlik-2» shaǵyn aýdanyn­daǵy 600 oryn­dyq mek­tep­tiń qurylysy salynyp jatyr. Bilim ordasynyń nysanyn 2024 jylǵy qyrkúıekke deıin paıda­lanýǵa tapsyrý jos­par­lanyp otyr. Atalǵan serik­tes­tik qurylysshylary buǵan qosa Tasqala, Erkinqala eldi me­ken­­derinde de mektepterdiń qu­ry­lysyn júrgizýdi qolǵa alǵan.

Al «Batys­Stroı­Ser­vıs­Atyraý» JShS-nyń 150-ge jýyq qury­lys­shysy 8 nysan­nyń qurylysyn sapaly júr­gi­zýdi maqsat etip otyr. Se­rik­­testiktiń ýchaske sheberi Erkebulan Esenovtiń aıtýyna qa­ra­­­ǵanda, salynyp jatqan nysandar áleýmettik sala úshin asa qajet. О́ıtkeni turǵyndar bal­tyry syzdap, basy aýyrsa, aýrý­hana dárigerlerine júginedi. Rýhanı azyq alý úshin mádenıet úılerine barady. Al sport ke­shen­deri salamatty ómir saltyn ustanyp, buqaralyq sportqa den qoıǵandardyń udaıy bas qosatyn nysanyna aınalady.

«Bizdiń qurylysshylar brıgadalary ár nysannyń sapaly salynýyna basa mán beredi. Ujymda qurylys salasynda tolymdy tájirıbesi qalyptasqan mamandar jınaqtalǵan. Tas qa­laý­­shylar, sylaqshylar jumy­syn jaýapkershilikpen atqara­dy», dedi E.Esenov.

Atyraýda qurylys ındýs­trııa­­syna mol úles qosyp júr­gen qurylysshylardyń kási­bı merekesi qarsańynda tas qa­laý­shylar men sylaq­shy­lar­dyń saıysy ótti. Oǵan qu­ry­lys kompanııalarynan 7 komanda qatysyp, sheberligin ortaǵa saldy. Qurylysshylar básekesine oblystyq memlekettik sáýlet-qurylys baqylaý bas­qar­masy­nyń bólim basshysy Rústem Maha­baev, sarapshy Talǵat Bıse­nov pen tehnıkalyq qada­ǵa­laýshy Qanat Ermuhanov qazy­lyq etti.

«El aýmaǵyndaǵy boı kó­ter­gen ár turǵyn úıde, ár ǵımaratta, áleýmettik nysanda qurysh qol­dy qurylysshylardyń qol­tań­basy bar. Qurylys ındýs­trııasyn damytýǵa úles qosyp júrgen qurylysshylarǵa da, salaǵa jaýapty mamandarǵa da úlken jaýapkershilik júktelip otyr. О́ıtkeni bárimiz túrli maq­sattaǵy ǵımarattar men tur­ǵyn úıler qurylysyn salyp qana qoımaı, onda jumys isteıtin, turatyn adamdardyń ómiri úshin jaýap beremiz. Sol sebepten qurylysshylardyń tájirıbesin shyńdaý, bir-birimen tájirıbe almasýyna saıystyń yqpaly zor bolady», dedi oblys ákiminiń orynbasary Qaırat Nurtaev.

Oblystyq qurylys basqar­masynyń basshysy Nurbergen Qusaıynovtyń aıtýynsha, mun­daı saıys osymen ekinshi ret ótkizilip otyr. Alǵash ret 2019 jyly ótkizilgen. Bul saıys qu­ry­lysshylardyń biliktiligin arttyrýǵa yqpal etedi.

«Bul saıysqa qatysý­shy­lar­dyń jumysyn baǵalaýǵa qu­rylys salasyndaǵy bilikti ma­­mandar shaqyryldy. Olar saıyskerlerdiń eńbek qaýip­siz­digin saqtaý deńgeıine, kirpishti qalaý tásiline, tik jáne kól­deneń tigisti saqtaýyna, syrtqy jáne ishki verstiń túzý­ligine, sylaqty tegis júr­gizýge, jalpy jumystyń sapasyna baǵasyn berdi», deıdi N.Qusaıynov.

Qurylysshylar saıysyna qazylyq etken mamandar she­shi­mimen jeńimpazdar men júldegerler anyqtaldy. Sylaq­shylar arasynan birinshi júldeni «Suńqar qurylys» JShS brıgadasy enshiledi. Al «ARSM» men «BatysAlıansStroı» JShS sy­laq­shylary ekinshi jáne úshin­shi júldeni jeńip aldy.

Tas qalaýshylar sheberligin bir-birinen asyrýǵa tyrysty. Saıystyń birinshi júldesi «TSG Construction» JShS komandasyna berildi. «BatysStroıServıs» ben «TarazQurylysInvest» JShS tas qalaýshylary ekinshi jáne úshinshi júldeni ózara bólisti.

Sondaı-aq shaǵyn fýtboldan týrnırge qurylysshylardan quralǵan 15 komanda qatysty. Týrnırde birinshi oryndy oblys­tyq jolaýshylar kóligi, avtomobıl joldary jáne energetıka basqarmasynyń ko­mandasy, ekinshi oryndy «Sala», úshinshi oryndy «BI Group» JShS komandasy ıelendi. Jasyl alańda joǵary sheberlik kórsetken bir­ne­she oıynshy atalymdar bo­ıyn­sha júldelerge ıe boldy. Arslan Qutfýllın – «Úzdik oıyn­shy», Ál-Farabı Qoıbaǵarov – «Úzdik shabýylshy», Janbota Nyǵmetov – «Úzdik surmergen», Aıdarbek Zınollaev – «Úzdik qaq­pashy», Turlan Aıtbaev «Úzdik qorǵaýshy» atandy.

Atyraý oblysy