Bılik tarmaqtary men onyń barlyq deńgeıiniń birlesken jumysy tıimdi zańdar qabyldaýdyń kepili jáne olardy oryndaý eldiń odan ári damýyna yqpal etedi. Senator Bekbolat Orynbekov bul jóninde Jambyl oblysy Jýaly aýdanynyń turǵyndarymen kezdesýde aıtty.
Depýtat sapar barysynda óńirdegi áleýmettik nysandardy jóndeý jumystarymen tanysty. Sonyń aıasynda ol №16 Jýaly kolledjinde jáne «Baýyrjan Momyshuly – Bereke-Jurymbaı» baǵytyndaǵy jolda atqarylyp jatqan jumysqa nazar aýdardy. Sondaı-aq úsh qabatty turǵyn úıdiń qurylysymen tanysty.
Sonymen qatar senator aýdandyq máslıhat depýtattarymen kezdesip, ótken sessııadaǵy Senat qyzmetiniń qorytyndylary týraly aıtyp berdi, jergilikti jerdegi áriptesterin yntymaqtasa jumys isteýge shaqyrdy.
«Senat depýtattary el damýyna tikeleı áser etetin asa mańyzdy zańdardy qabyldaý úshin belsendi jumys istep keledi. Sondaı-aq biz qabyldanǵan zańdarǵa da túzetýler engizý isine basa mán beremiz. Bul rette halyqpen keri baılanystyń mańyzdy ekeni sózsiz. Sol úshin de shalǵaıdaǵy eldi mekenderdiń turǵyndarymen kezdesýge úlken kóńil bólip otyrmyz. Biz birlesken kúsh-jigerdiń arqasynda ǵana tıimdi jáne ádiletti zańdar qabyldaımyz», dedi kezdesý barysynda senator Bekbolat Orynbekov.
* * *
Senat depýtaty Ǵaýez Nurmuhambetov «Kostanay Invest 2023» ınvestısııalyq forýmynyń jumysyna qatysyp, Qostanaı oblysynyń ınvestısııalyq áleýetin arttyrý máselelerine nazar aýdardy.
Is-sharaǵa qatysýshylar Qostanaı oblysynyń ınvestısııalyq áleýetin keńeıtýge yqpal etetin óndiristik jáne áleýmettik saladaǵy jobalarmen tanysty.
«Oblys ekonomıkasyn odan ári damytý úshin belsendi túrde ınvestısııa tartýdyń mańyzy zor. Osy forýmda kópshilikke tanystyrylyp otyrǵan jobalardy iske asyrý óńdeý ónerkásibiniń úlesin arttyratyny sózsiz. Bul óz kezeginde óńirdiń ekonomıkalyq damýyna tyń serpin beredi», dedi Ǵaýez Nurmuhambetov.
Sonymen qatar senator forým barysynda aıtylǵan barlyq usynys óńdeý ónerkásibi salasyn retteıtin qoldanystaǵy zańnamany odan ári jetildirý kezinde eskeriletinin jetkizdi.
* * *
Senator Nurtóre Júsip Qyzylorda oblysy Shıeli aýdany №159 orta mekteptiń ustazdarymen kezdesti.
Kezdesýde ol bilim berýge, pedagogter men sala qyzmetkerleriniń áleýmettik kepildikterin nyǵaıtýǵa jáne balalardy býllıngten qorǵaýǵa qatysty Parlament qabyldaǵan zańdar týraly aıtyp berdi.
Depýtat mekteptiń materıaldyq-tehnıkalyq bazasymen tanysyp, bilim ordasyndaǵy kitaphananyń qoryna nazar aýdardy.
«Kitap – sarqylmas danalyqtyń qaınar kózi. Biz aqyldy jáne bilimdi urpaqty tárbıeleý úshin kitap oqýǵa degen súıispenshilikti arttyrýymyz kerek. Qazirgi tańda memleket el kitaphanalaryn úzdik kitaptarmen toltyra otyryp, sapaly bilim alýǵa barlyq jaǵdaıdy jasap keledi. Bul baǵyttaǵy jumys odan ári jalǵasa beredi dep senemin», dedi Nurtóre Júsip.
Senator kezdesý sońynda mektep kitaphanasyna óziniń jeke jınaǵynan 150 kitap tartý etti.