Mahambet aýdanynyń Alǵa aýylynda turatyn Janargúl Amanǵalıeva jazǵy mezgilge arnalǵan aıaqkıim tigedi. Bul kásibin bastaý úshin memleketten qaıtarymsyz qarjy alǵan.
Tigin tigý isin bala kúninde anasynan úırengen. Sodan beri qolynan ıne-jipti tastamaı keledi. Al aıaqkıim tigýmen tek hobbı retinde aınalysyp, bastapqyda aǵaıyn-týystarynyń tapsyrysyn oryndap júrgen. Keıinnen bul isin turaqty kásipke aınaldyrýǵa bekinipti.
«Kásip bastaý ońaı emes. Oǵan táýekel de, tipti qarjy da kerek. Sondyqtan aýdandyq jumyspen qamtý ortalyǵynyń mamandarynan, «Atameken» UKP-nyń óńirlik fılıalynan keńes alyp, bıznes-jospar qurdym. 2021-2025 jyldarǵa arnalǵan kásipkerlikti damytý jónindegi ulttyq joba aıasynda 1 mln 380 myń teńge kólemindegi qaıtarymsyz qarjyǵa qol jetkizdim. Tigin máshinkesin, ózge de qural-jabdyqtardy satyp alyp, shaǵyn sheberhana ashtym», deıdi Janargúl.
Ol aıaqkıimniń sapaly bolǵanyn qalaıdy. Sol sebepten sapaly jipti Iran men Túrkııadan tapsyryspen aldyrady.
«Kelinim ózim sekildi qolónerge jaqyn jan. Úıden ulttyq naqyshpen kórpe tigedi. Onyń bárin tapsyryspen jasaıdy. О́zim bir kúnde 2-3 jup aıaqkıim daıyndaımyn. Baǵasy – 5 myń teńge. Endi balalarǵa arnalǵan jabyq úlgidegi aıaqkıimderdi toqýǵa kóshemin», deıdi J.Amanǵalıeva.
Onyń aıtýynsha, aıaqkıimniń bazar men dúkende satylatyn túrlerinen birneshe ereksheligi bar. Birinshiden, aıaqty terletpeıdi. Ekinshiden, ıis shyǵarmaıdy. Úshinshiden, bul aıaqkıim jýǵan soń óńin buzbaıdy.
Atyraý oblysy