Uzaq jyldar boıy baspanaly bolýdy armandaǵan tarazdyq kópbalaly, tolyq emes, sondaı-aq múmkindigi shekteýli balalardy tárbıelep otyrǵan otbasylar «2-10-20» baǵdarlamasy aıasynda «Uly dala» shaǵyn aýdanyna qonystana bastady.
«Otbasy Bankine» 10 paıyz kóleminde salym salyp, jańa páterge qol jetkizgen azamattarǵa arnalǵan turǵyn úılerdi qalalyq ákimdik salǵan. Barlyq jaǵdaı jasalǵan páterdiń bir sharshy metri naryqtaǵy baǵadan áldeqaıda tómen. Naqtyraq aıtar bolsaq, qonys toıyn toılaǵandar páterdiń árbir sharshy metri úshin 160 myń teńgeden tólemek.
Shahardaǵy eń úlken shaǵyn aýdanǵa qonys aýdarǵan jańa páter ıelerin oblystyq máslıhattyń tóraǵasy Abdaly Nuralıev, Taraz qalasynyń ákimi Baqytjan Orynbekov, «Otbasy Bank» AQ Basqarma tóraıymynyń orynbasary Nurlan Aqshanov pen Jambyl oblystyq fılıalynyń dırektory Nurlan Sultanov quttyqtap, qýanyshqa ortaqtasty.
Taraz qalasynyń ákimi Baqytjan Orynbekovtiń aıtýynsha, sońǵy tórt jyldyń bederinde qala boıynsha 5 800 turǵyn páterli bolǵan.
«Keıingi tórt jylda memlekettik baǵdarlamalar arqyly 3 844 azamat baspanaly bolǵanyn aıta ketken jón. Sonymen qatar páter kezeginde turǵan 1 956 otbasy baqyt shamyn jaqty. Osy jyly qala aýmaǵynda 42 turǵyn úıdiń qurylysyn júrgizip, jyl qorytyndysynda 2 820 páterdi paıdalanýǵa berýdi josparlap otyrmyz. Qazirgi kezge deıin 460 páterli 6 úıdiń qurylys jumystary aıaqtaldy. Elimiz boıynsha qoljetimdi turǵyn úı saıasatyn damytýǵa aıryqsha basymdyq berilip otyrǵany belgili. Búginde «Baqytty otbasy» baǵdarlamasy aıasynda shahardyń biraz turǵyny «Uly Dala» shaǵyn aýdanynan baspanaly bolyp otyr. Bul jumystar aldaǵy ýaqytta da laıyqty jalǵasyn tabady», deıdi Taraz qalasynyń ákimi B.Orynbekov.
«Otbasy Bank» AQ Jambyl oblystyq fılıalynyń dırektory Nurlan Sultanov keltirgen derekterge sáıkes atalǵan baǵdarlama boıynsha Jambyl oblysynda bıyl 342 otbasy jańa páterge qonystanady. Olardyń tańdaýyna 460 páter usynylady. Búgingi tańda «2-10-20» baǵdarlamasy aıasynda elimiz boıynsha 16 myńnan asa otbasy jeke páter satyp alý múmkindigine ıe boldy. Bank qyzmetkerleri muqtaj azamattarǵa qoldan kelgen kómekti aıaǵan joq. Baǵdarlamaǵa qatysýshylar úshin jaǵymdy jańalyq bar ekenin aıta ketken lázim. Bıyl bankke respýblıkalyq bıýdjetten 20 mlrd teńge qarajat bólindi. Baǵdarlamaǵa qyzyqqan basqa qatysýshylar 2 paıyzdyq mólsherlememen jeńildetilgen zaem ala alady. Aldaǵy ýaqytta jańa ótinimderdi qabyldaý bastalady. Bul týraly qosymsha habarlaımyz. Buǵan qosa turǵyndar naryqtyq baǵdarlama arqyly 50 paıyz salym salyp, páter ala alatynyn da aıta ketken jón. Oǵan barlyq azamat qatysa alady», deıdi «Otbasy Bank» AQ Basqarma tóraıymynyń orynbasary Nurlan Aqshanov.
Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasyna sáıkes «2-10-20» baǵdarlamasynyń sharttaryna ózgerister engizilgen. Endi jetim jáne ata-anasynyń qamqorlyǵynsyz qalǵan balalar, sondaı-aq I jáne II toptaǵy múgedektigi bar adamdar sanattary boıynsha turǵyn úıge kezekte turǵan azamattar da baǵdarlamaǵa qatysa alady.
Qaladaǵy eń úlken shaǵyn aýdanǵa qonystanǵan jańa páter ıeleriniń qýanyshynda shek joq. Ańsaǵan armanyna jetken olardyń bal-bul janǵan júzinen shattyqtyń taby aıqyn seziledi.
«Kez kelgen adam óziniń jeke úıiniń bolǵanyn qalaıdy ǵoı. Jantaıyp jatqan adamǵa baq qonbaıtyny álimsaqtan aıan. Biraz jyl buryn «Otbasy Bankke» qajetti somadaǵy salymdy salýdy bastadym. Al 2020 jyly kezekke turdym. Shynyn aıtý kerek, banktiń menedjerleri bizge bar yntasymen kómek kórsetti. Olar bar bilgenin bizge túsindirip, baspanaly bolýymyzǵa atsalysty. Allanyń qalaýymen búgin sol qýanyshty kúnge de jetip otyrǵan jaıymyz bar. Bank áýeli ótinish ıelerin rezervke qoıady, keıin negizgi tizimge qosady. Men úsh bólmeli páterdi 16 jylǵa alyp otyrmyn. Alaıda ústindegi ústemeaqysy 2 paıyz ekenin eskersek, men úshin óte tıimdi. Osy sanatqa jatatyn barlyq otbasy baspanaly bolsa degen tilegim bar. О́ıtkeni ár qazaq baqytty ǵumyr keshýge laıyqty», deıdi bes balanyń anasy Qalamqas Ametalıeva.
Bıyl Jambyl oblysynyń 5 400-den asa turǵyny bolashaqta jyljymaıtyn múlik satyp alý maqsatynda jańa depozıtter ashqan.
«Úsh jyl buryn kezekke turýdyń nátıjesinde búgin úsh bólmeli páterdiń kiltin aldym. Erinbeı salym salǵan adam maqsatyna jetedi eken. «2-10-20» baǵdarlamasy aıasynda búgin rasymen de baqytty kúı keship turmyz. Kópbalaly otbasylarǵa qoldan kelgen kómegin aıamaı, keńes bergen bank qyzmetkerleriniń eńbegi jana bersin. Barlyq kópbalaly otbasy jańa baspanaǵa qol jetkizip, qýanyshqa kenelsin. Jańa úıge qonys aýdarǵandardyń deni ýaqytynda jaldamaly páterde turǵany belgili. Qysqasy, erinbeı salym salǵan osy sanattaǵy otbasylardyń eńbegi eleýsiz qalmaıtynyna eshqandaı kúmán joq», deıdi tórt balanyń anasy Altynshash Qulahmetova.
Ýaqyt ótken saıyn «2-10-20» baǵdarlamasy aıasynda baspanaly bolyp jatqan otbasylardyń sany arta tústi. Jambyl oblysynda bıyldyń ózinde tıisti sanatqa jatatyn 300-den asa otbasynyń jańa úıge kóshetini janǵa jylý uıalatady.
Taraz