Ázerbaıjannyń bas shahary – Bakýde nysana kózdeýden álem chempıonatynyń jalaýy jelbiredi. 31 tamyzǵa deıin sozylatyn básekeler barysynda qatysýshylar tapansha atý, myltyq atý, stend atý jáne jyljymaly nysanany kózdeýden saıysqa túsip jatyr. Osy jarysta Parıj Olımpıadasyna joldamalar sarapqa salynady.
Álem chempıonatynyń ashylý saltanaty «Baku Crystal Hall» ámbebap kesheninde ótti. Oǵan sportshylar men jankúıerlerden bólek jergilikti bılik basyndaǵy azamattar men osy sport túriniń mamandary qatysty. Alǵashqy bolyp sóz alǵan Halyqaralyq nysana kózdeý federasııasynyń (ISSF) prezıdenti Lýchano Rossı: «Keıingi jyldary Ázerbaıjanda sporttyń san alýan túri boıynsha kóptegen dúbirli dodalar asa joǵary deńgeıde uıymdastyrylyp júr. Mergender jarysynyń dárejesi de bıik bolatynyna esh kúmánim joq. Aldaǵy eki aptada biz nysana kózdeýdiń barlyq baǵdarlamasy boıynsha úzdikterdi anyqtaımyz. Parıj Olımpıadasyna deıin bir ǵana jyl qaldy. Sol sebepti osy álem chempıonatynda joldamalardyń basym bóligi sarapqa salynady», dep málimdedi.
Kaspıı teńiziniń jaǵalaýynda elimizdiń týy astynda 26 sportshy óner kórsetedi. Olar: Eldar Imanqulov, Valerıı Raqymjan, Maksım Mazepa, Nıkıta Chırıýkın, Rýslan Iýnýsmetov, Artemıı Kabakov, Alekseı Lotarev, Sáýle Álimbek, Olga Aksenova, Irına Iýnýsmetova, Valerııa Popelova (tapansha); Islam Sátbaev, Iýrıı Iýrkov, Konstantın Malınovskıı, Ilıa Fedın, Arına Altýhova, Elızaveta Bezrýkova, Aleksandra Le, Anastasııa Grıgoreva (myltyq); Baqtııar Ybyraev, Andreı Hýdıakov, Asadbek Nazırkýlıev, Ilıa Zoteev, Fatıma Irnazarova, Zýhra Irnazarova jáne Aleksandra Sádýaqasova (jyljymaly nysana).
Nysana kózdeýden elimizdiń ulttyq quramasy Bakýdegi álem chempıonatyna tyńǵylyqty daıarlandy. Jyl basynan beri olar Indonezııa men Ázerbaıjanda uıymdastyrylǵan Álem kýboginiń kezeńdik saıystaryna qatysty. Qazaqstan Respýblıkasynyń spartakıadasynda baq synap, Qytaıdyń Chendý qalasynda alaýy tutanǵan jazǵy Dúnıejúzilik ýnıversıadada óner kórsetti. Sońǵy oqý-jattyǵý jıynyn quralaıdy kózge atqan mergender Ázerbaıjannyń Gabala qalasynda ótkizip, osy jaqta sheberlikterin ábden shyńdady. Endi biz jerlesterimiz Bakýde barynsha jaqsy óner kórsetedi dep úmittenemiz.