О́tken aptada el astanasynda XIV Halyqaralyq «Azııa jańǵyryǵy» sırk óneri festıvali ótti. Elordanyń 25 jyldyǵyn merekeleý aıasynda Astana qalasynyń Mádenıet basqarmasynyń qoldaýymen uıymdastyrylǵan óner merekesi astanalyq sırktiń dástúrli jobasy retinde tanymal.
«Azııa jańǵyryǵy» alǵash ret 2007 jyly uıymdastyrylyp, qazir osy óner salasyndaǵy bedeldi halyqaralyq festıvaldyń birine aınalǵan. Osy ýaqytqa deıin onda álemniń úzdik sırk nómirleri kórsetilip, álemniń túkpir-túkpirindegi ataqty sırk ártisteriniń ónerin tamashalaýǵa múmkindik berdi. Búginde festıval ótetin kúnderdi Astana jurtshylyǵy ǵana emes, barsha respýblıka halqy asyǵa kútedi.
Bıyl on tórtinshi ret ótken festıval Azııa elderiniń ǵana emes, Eýropa, Soltústik Amerıka memleketteriniń sırk maıtalmandaryn jınady. Atap aıtsaq, AQSh, Fransııa, Mońǵolııa, Qyrǵyzstan, О́zbekstan, Reseı, Belarýs, Majarstan, Qytaı, Bolgarııa, Izraıl, Iаkýtııa, Germanııa, Tájikstan jáne Qazaqstan ártisteri A jáne B konkýrs baǵdarlamalarynda bes kún boıy astanalyq sırk arenasynda óner kórsetti.
О́ner dodasyna qatysýshylarǵa osy salada álemde moıyndalǵan mamandar baǵa berdi.
Sonymen, aıtýly festıvaldyń Gran-prı júldesin «Aǵaıyndy Gertnerlerdiń attraksıony» sırk nómiri (Germanııa) ıelense, Altyn júldeni joǵary oryndaýshylyq sheberligi men kásibıligi úshin «Slack Wire» (Qytaı) erkin symdaǵy sırk nómiri, «Karpe Dıem» áýe gımnasttary sırkiniń qoıylymy (Shymkent), Ádilet Tıkanovtyń jetekshiligimen «Hassak» qos machty sırk akrobaty (Almaty), sondaı-aq Ilıa Tıýfıaevtyń jetekshiligimen qos taıaqtaǵy akrobattar jeńip aldy. Al kúmis júlde Andreı Pogorelovtyń jetekshiligimen «Otty dóńgelek» sırk nómiri (Reseı), áýe gımnasttarynyń «Sezimder qozǵalysy» trapesııalyq trapesııa aktisi (Belarýs), «Dýet Antresol» (Reseı) dóńgelektegi áýe gımnasttarynyń ónerine buıyrdy. Qola júlde «Earth Sky» ekvılıbr sırk nómiri (Bolgarııa), machtadaǵy aeroakrobattardyń qoıylymy (Iаkýtııa), «Armanyńa umtyl» áýe gımnastıkasynyń sırk nómirine (Almaty) tabystaldy. Budan bólek, arnaıy syılyqtar tapsyrylyp, túrli álemdik festıvaldarǵa shaqyrtýlar berildi.
Dástúrli túrde ótip kele jatqan festıval qazaq sırk óneriniń damýyna, shyǵarmashylyq tynysynyń keńeıýine yqpal etetini sózsiz. Kórermenge lyq toly zal, túrli emosııa, jas ta, kári de qyzyǵa tamashalaǵan ártister – sonyń dáleli.