Aq kımeshegimen alystan Alataýdaı kórinetin aq jaýlyqty ájelerimizde keshegi ata-babalarymyzdan qalǵan sarqyt bar. Ol ulttyń salt-dástúrine tamyzyq bolar tálimge toly. Muny Jetisý tórinde ótken «Ájeler álemi» baıqaýynda baıqadyq.
«Qarqara jaýlyq, kımeshek, jyrǵa ózek bolǵan, kúıge sep» dep aqyndarymyz jyrlaǵandaı, kımeshegin kirletpeı, kóńiline kir shaldyrmaı júrgen sol aq samaıly analarymyz jýyrda óner básekesine tústi.
Oblystyq ardagerler keńesiniń uıymdastyrýymen órnek tapqan «Ájeler álemi» baıqaýy qyzyqty ótti. Balasyn qanattandyryp, nemere men shóberesin baýlyp otyrǵan oblysymyzdaǵy belsendi ájeler doda kórigin qyzdyryp, bes kezeń boıynsha júırikti anyqtady.
Atalǵan is-sharanyń basynda oblystyq Ardagerler keńesiniń tóraǵasy Ermek Kelemseıit sóz alyp, rýhanııattyń órinde, ónegeli ómirimizdiń tórinde turǵan analardyń qoǵamdaǵy ornyn, parqy men narqyn salmaqtap, barsha anaǵa sáttilik tiledi.
Jarys sharty boıynsha ózin tanystyryp, ónerin, ulttyq salt-dástúrimizden kórinis, qolóner týyndysyn kórsetken ájeler, óz kezeginde dástúr boıynsha qoıylǵan saýaldarǵa jaýap berdi. О́tkenimizdiń ónegesin dáriptep, óz ónerlerin kórsetý, boıyndaǵy meıirimdilik pen izgilik qasıetin saıys arqyly kórermenge darytý maqsatynda uıymdastyrylǵan bul dodada qazylar alqasynyń sheshimimen Kóksý aýdanynyń atynan synǵa túsken Makýra Núsipova ájemiz 3-oryn ıegeri dep tanyldy. Eskeldilik Jaqsyhan Turysbek ájeı 2-orynnan kórinse, ónerimen oza shapqan tekelilik Oraltaı Álıeva ájeı jarys jeńimpazy dep tanyldy.
Jarys negizindegi aqshalaı syılyqtarǵa ıe bolǵan júldegerlerden bólek, baıqaýda belsendilik tanytqan óńirdegi ájeler yntalandyrý syılyǵyna ıe boldy. Olar da qarjylaı syıaqymen marapattaldy.
Jetisý oblysy