23-27 tamyz aralyǵynda Ispanııanyń Valensııa qalasynda kórkem gımnastıkadan álem chempıonaty ótedi. Bul jarysta kelesi jyly Parıjde alaýy tutanatyn Olımpııa oıyndarynyń 19 joldamasy sarapqa salynady. Baq synaýshylar qatarynda ataqty Álııa Iýsýpova jetekshilik etetin Qazaqstannyń ulttyq qurama komandasy da bar.
Pıreneı túbegindegi dodanyń jekelegen saıysynda Eljana Tánıeva men Erıka Jaılaýova synǵa túsedi. Eljananyń esimi jankúıerlerge jaqsy tanys. Ol – elimizdiń eń úzdik gımnasshysy. 17 jastaǵy symdaı tartylǵan symbatty qyz sońǵy eki Azııa chempıonatynda 1 altyn, 6 kúmis jáne 2 qola medal oljalady. Dúnıejúzilik ýnıversıadada – úsh, Islam yntymaqtastyǵy oıyndarynda tórt ret jeńis tuǵyryna kóterildi. Odan bólek, Álem kýboginiń kezeńdik saıysynda, Azııa kýbogi, «Gracia Fair Cup», «Aphrodite Cup», «Holon» jáne «Sofııa kýbogi» sekildi halyqaralyq týrnırlerde júldegerler sanatyna qosyldy. Byltyrǵy álem chempıonatyn Tánıeva segizinshi orynmen qorytyndylady. Al Erıka – jastar býyny arasynan áıelder dýyna endi ǵana qosylǵan sportshy. Ol bıyl Bolgarııada jalaýy jelbiregen jarysta qola medaldi moınynda jarqyratyp, kópshiliktiń qoshemetine bólendi. El jankúıerleri atalǵan eki gımnasshy qyzǵa úmit artyp otyr.
Toptyq básekede Arýjan Qasenova, Aıdana Shaıahmetova, Baıan Qoıbaǵar, Arýjan Qalsaeva, Aqsuńqar Ábdirahman jáne Aıaýlym Qadyr syndy sulýlar Qazaq eli namysyn qorǵaıdy.
Kórkem gımnastıkadan sońǵy álem chempıonaty byltyr Bolgarııanyń bas shahary – Sofııada ótti. Vıtosh taýynyń eteginde jalaýy jelbiregen jarysta Italııa quramasy keremet óner kórsetti. Apennın túbeginen kelgen arýlar 6 altyn, 1 kúmis jáne 2 qola medal ıelenip, jalpykomandalyq esepte jeke-dara kósh bastady. Jekelegen saıysta Sofııa Raffaellıdiń jalǵyz ózi tórt ret altynnan alqa taqty. Ol «qursaý», «dop», «taspa» jáne kópsaıysta aldyna jan salmady. Odan bólek, atalǵan memlekettiń ókilderi eki ret komandalyq saıysta top jardy. Sofııa tórinde Bolgarııanyń ánurany eki ret (2 altyn+3 kúmis+1 qola), Germanııanyń gımni bir ret (1+3+1) shyrqaldy. Sondaı-aq júlde alǵandar qatarynda Izraıl (0+2+0), Ispanııa (0+0+3), Ázerbaıjan (0+0+1) jáne Slovenııanyń (0+0+1) gımnasshylary boldy.
Byltyrǵy álemdik dodanyń kópsaıysynda Eljana Tánıevanyń segizinshi oryn alǵanyn biz joǵaryda aıttyq. Sol jarysta 121.000 upaı jınaǵan jerlesimiz tek Sofııa Raffaellı (Italııa, 133.250 upaı), Darıa Varfolomeeva (Germanııa, 132.450), Stılıana Nıkolova (Bolgarııa, 128.800), Vıktorııa Onoprıenko (Ýkraına, 125.050), Mılena Baldassarı (Italııa, 124.900), Adı Asıa Kas (Izraıl, 124.450) jáne Ekaterına Vedeneeva (Slovenııa, 123.150) syndy sportshylardan qalyp qoıdy.