Keshe Premer-mınıstrdiń orynbasary – eńbek jáne halyqty áleýmettik qorǵaý mınıstri Tamara Dúısenovanyń tóraǵalyǵymen týrızm salasyn damytý máseleleri jóninde keńes ótti, dep habarlaıdy Egemen.kz Úkimettiń baspasóz qyzmetine silteme jasap.
Keńes barysynda otandyq týrızmniń problemalyq máseleleri talqylandy.
Elordalyq týrbıznes ókilderi vızalyq rásimderdi jedeldetý jáne sıfrlandyrý, týroperatorlar men gıdterdiń qyzmetin retteý jumysyn kúsheıtý, týrızm salasyndaǵy ınvestısııalyq jobalardy qoldaý jóninde usynystar aıtty.
Sonymen qatar charterlik baǵdarlamalardy sýbsıdııalaý jáne halyqaralyq áýe kompanııalaryn tartý tártibin jeńildetý boıynsha usynystar aıtyldy.
Týrızmniń ekologııalyq aspektilerine, ekojúıege túsetin júktemeni retteýge jáne týrıstik oryndarda tazalyqty saqtaýǵa erekshe nazar aýdaryldy.
Keńes qorytyndysy boıynsha Premer-mınıstrdiń orynbasary – eńbek jáne halyqty áleýmettik qorǵaý mınıstri T. Dúısenova Mádenıet jáne sport mınıstrligine osy máselelerdi bıylǵy jylǵy 15 qyrkúıekte Aqtaý qalasynda Premer-mınıstrdiń qatysýymen ótetin Týrızmdi damytý jónindegi halyqaralyq forým aıasynda talqylaý úshin daıyndaýdy tapsyrdy.
Aıta ketý kerek, týrızm salasynyń máselelerin ortaǵa salatyn osyndaı kezdesýler aldaǵy ýaqytta júıeli túrde ótedi.