Atyraý oblysyndaǵy Kenbaı aýylynda jalǵyz oqýshy bilim alady. Bıliktegiler bala sany az mektepke qyrýar qarjy jumsaı almaıtyndaryn aıtady. Al mundaǵy halyq mektep jabylsa aýyl qurıdy dep otyr, dep habarlaıdy Egemen.kz KTK telearnasyna silteme jasap.
Úshinshi synypqa baratyn balaǵa 5 muǵalim sabaq beredi. Atalǵan mekemede odan bólek 15 qyzmetker jumys isteıdi. Jalǵyz balany oqytyp kelgen mektep bıyl jabylýy múmkin. Bıliktegiler mektepke qyrýar qarjy jumsaı almaıtyndaryn aıtady. Bul sheshimge aýyl halqy túbegeıli qarsy bolyp otyr.
«Men kúıeýimniń jalǵyz aılyǵyna kámeletke tolmaǵan 4 balamen qalalyq jerde tura almaımyn. Sol úshin osy jerde turyp jatyrmyn. Men aýylym úshin, osy jer úshin shyryldap turmyn. Sol úshin mektepti jappaýlaryn talap etemin. Bala joq, bala joq deıdi. Ber jaǵynda ósip kele jatqan 10-nyń ústinde bala bar. Mektep joǵalyp ketse, bizdiń aýyl joǵalyp ketedi», deıdi aýyl turǵyny Aısara Ábezbaeva.
Bútin bir aýyldy asyrap otyrǵan mektepti jappaýdy suraǵan kenbaılyqtar jergilikti bılik kerisinshe eldi mekenge kóńil bólýleri kerek deıdi. Olar ósip kele jatqan balalardy qalaǵa qańǵyta almaımyz dep otyr.
Sheneýnikter bul mekteptiń jóndeý jumystaryna osydan úsh jyl buryn 30 mln teńge jumsapty. Oǵan qosa osy aýylǵa gaz júrgizýge 2 mlrd teńge taǵy bólingen. Qaraıǵan qarjy jumsalyp jatqan eldi meken turǵyndary tentirep ketýden qorqady. Al bilim basqarmasy 1 bala úshin 1 mekeme ustap otyrýdyń tıimsizdigin aıtady.
«Qarjylyq baǵytynan alyp qaraǵanda, bir balaǵa birneshe personaldy ustap, bir mektepti ustap turý qıyndyq týdyryp otyr. Jalpy halyqtyń usynys pikirin eskerip, ári qaraı máseleni oń baǵytta sheshý úshin talap qoıǵaly otyrmyz», dedi oblystyq bilim berý basqarmasy basshysynyń orynbasary Oryntaı Bımanova.