Jetisý jerindegi tabıǵı apat eldi eleń qylyp qoıdy. Qarapaıym turǵyndar kúz jaqyndaǵanda baspanasynan aıyrylyp, álem-jálem kúıge tústi. Degenmen oblys ákimdigi halyqtyń tilegin qalys qaldyrmaımyz dep otyr.
Sońǵy málimetterge súıensek, Eskeldi aýdanyna qarasty Eshkiólmes jáne Abaı aýyldaryndaǵy jańbyr sýy shaıyp ketken úıler tolyq tekserilip, soǵan saı jumystar júrgizilýde. Qazir 89 úıge zalal keltirilgeni anyqtalyp otyr. Onyń ishinde 22 úı apatty dep tanylyp, súrilýge jatady degen qorytyndy shyǵarylǵan. Qalǵan úılerge kúrdeli jóndeý jumystary júrgiziledi. Búginde eldi mekenderdiń kósheleri men turǵyn úı aýlalaryn batpaq pen qoqystan tazartý jumystary aıaqtalǵan. 200 turǵyn úı aýlalary tazartylyp, 200 tonna qoqys shyǵaryldy. TJ saldaryn joıý sharalaryna jalpy sany 400 adam, 50-den asa tehnıka tartylǵan. Aldaǵy ýaqytta mundaı tótenshe jaǵdaıdy boldyrmaý úshin kanal arnalaryn tazalaý, kanaldyń ótkizý qabiletin ulǵaıtý jumystary júrgizilýde. Sondaı-aq 7 kóshede uzyndyǵy 12,7 shaqyrym avtokólik jolyna ortasha jóndeý júrgizilip, 4 kóshedegi 4 shaqyrym jolǵa kósheni jaryqtandyrý tirekteri ornatylady. Materıaldyq shyǵynyn esepteý tolyq aıaqtalǵannan keıin atalǵan eldi mekenderdegi zardap shekken turǵyndardyń bárine tıisti materıaldyq kómek kórsetiledi.
Aıtpaqshy, aýyl halqy Eskeldidegi birneshe máseleni ashyq aıtyp, járdemdesýin surap otyr. «Qarabulaqqa tartylǵan gaz qubyry nege sonyń irgesindegi Eshkiólmeske jetkizilmeıdi? Bizge gaz qashan keledi?» deıdi turǵyndar. Oblystyq energetıka jáne TÚKSh basqarmasynyń basshysy Áset Qanaǵatovtyń aıtýynsha, aýylǵa kógildir otyn 2024 jyly beriledi, ıaǵnı Eshkiólmes aýyly josparda bar. Sol sııaqty aýyl kósheleriniń jaıy da aıtyldy. Eshkiólmestegi Ýshakov, Tynyshbaev kósheleri jáne «Sanjar» saýda úıinen Kırzavodqa deıingi uzyn kóshege ortasha jóndeý jumystary jasalady. Qarajaty bólingen. Tek memlekettik satyp alý konkýrsynyń qorytyndysymen kelispeýshilikterine baılanysty merdiger kompanııalardyń ózara daýlaryn zań aıasynda qaraý prosesteri júrip jatyr. Bir sheshim shyqqannan keıin merdiger anyqtalyp, jóndeý jumystary júrgiziledi.
Aýyl balalarynyń Qarabulaqqa baryp oqýy da qıyndyq týǵyzady deıdi turǵyndar. Jáne Qarabulaqpen eki araǵa júretin qoǵamdyq kóliktiń kúnine eki ret qatynaıtyny da azdyq etedi eken. Osy oraıda oblys ákimi bul aýylǵa 200 oryndy jańa mektep salý týraly sheshim qabyldanǵanyn jetkizdi. Jańa nysan 2024-2025 jyldary iske qosylady. Al qoǵamdyq kólik oblys ákiminiń tapsyrmasy boıynsha endi kúnine eki ret emes, tórt ret júredi.
Eskeldi aýdanynda oryn alǵan tótenshe jaǵdaıdyń saldaryn joıý sharalaryna jastar da qolǵabys etti. Eriktiler uıymdary alǵashqy kúnnen-aq kómek qoryn ashyp, evakýasııalanǵan azamattarǵa jáne óz úıinde qalǵan zardap shegýshilerge de azyq-túlik, kıim-keshek aparyp, járdem jasady. Sol sııaqty aýlalardan sý men batpaq shyǵarý, kóshe tazartý, qoqys shyǵarý jumystaryn atqarǵan jeke quram men eńbek ujymdaryna as ázirleý isine atsalysty. «Jetisu jastary» ortalyǵynyń «Eskeldi jastary» fılıalynyń jetekshisi Serik Joldybaevtyń aıtýynsha, fılıal arnaıy kómek qoryn ashyp, zardap shekkenderge qoldaý kórsetken. Sol sııaqty Abaı, Eshkiólmes aýyldarynda sý basqan úılerdi tazalaý jumystaryna kómekke kelgen azamattarǵa, atap aıtqanda úsh kúnniń ishinde jalpy sany 1 200-deı adamǵa Imam Aǵzam meshitinde tamaq ázirleýge kómek etti, bul jumys áli de jalǵasyp jatyr. Sol sııaqty Lider.kz «Adal» eriktiler uıymy da ıgi iske qol ushyn sozdy.
Jalpy, Eskeldi aýdanynda sý basqan aýlalardan 6 024 tekshe metr sý shyǵarylyp, uzyndyǵy 450 metr aryq júıesi tazartylǵan. 120 úıdiń aýlasy tazartylyp, 360 tekshe metr batpaq shyǵarylǵan. Eshkiólmes jáne Abaı aýyldaryndaǵy aýla aýmaqtary men turǵyn úılerdi qalpyna keltirý jumystarymen budan ári óz retimen Eskeldi aýdanynyń ákimdigi aınalysady.
Jetisý oblysy