«QR Prezıdenti Is Basqarmasy Medısınalyq ortalyǵynyń kúnderi» jobasy aıasynda Qostanaı oblysyndaǵy delegasııa quramynda bolǵan QR PIB MO aýrýhanasy Arıtmologııa bólimshesiniń meńgerýshisi, bas arıtmolog, professor Aıan Ábdirahmanov 7 adamnyń júregine kúrdeli ota jasady, dep habarlaıdy Egemen.kz.
Sátti aıaqtalǵan kúrdeli otalar júrek qantamyrlaryna bitken aqaýlardy qalpyna keltirip, ókinishti saldardyń aldyn alýǵa bolatynyn kórsetti. Bul oblystaǵy dárigerler úshin de qundy tájirıbe boldy.
«Qostanaı oblysynda júrek qantamyrlaryna 7 operasııa jasadyq. Sonyń ishinde Rýdnyı qalasynda alǵash ret 4 naýqasqa Gıs túıininiń sol aıaqshasyna ekikameraly kardıostımýlıator ımplanty qoıyldy. Qalǵan úsh operasııa Qostanaıdaǵy Kardıologııalyq ortalyqta jasaldy. Birinshi, júrek jetispeýshiligin emdeý jáne kenetten ólip ketýdiń aldyn alýda úshkameraly kardıovertera-defıbrıllıator apparatyn qoıdyq. Ekinshi naýqasqa keńeıtilgen kardıomıopatııa dıagnozy boıynsha ómirge qaýip tóndiretin arıtmııany joıý jáne júrektiń toqtap qalýyn boldyrmaý úshin kardıoverter-defıbrıllıator ornatyldy. Úshinshi operasııada naýqasqa atrıaldy fıbrıllıasııa boıynsha júrek yrǵaǵynyń korreksııasy jasaldy. О́ńirdegi áriptester de operasııaǵa qatysyp, QR PIB MO aýrýhanasynda júrek qantamyryna qoldanylatyn operasııa tásilderin úırendi. Operasııadan keıin naýqastardyń jaǵdaıy jaqsy, dáriger baqylaýynda bolady», dedi QR PIB MO aýrýhanasy Arıtmologııa bólimshesiniń meńgerýshisi, bas arıtmolog, professor Aıan Ábdirahmanov.
Bas arıtmologtiń aıtýynsha, Rýdnyı qalasynda alǵash ret jasalǵan bul operasııalardy ári qaraı kún tártibine engizýge bolady, degenmen taǵy da birneshe sheberlik sabaǵyn ótkizý óńir dárigerlerine paıdaly bolmaq. QR PIB MO men Qostanaı oblysy ákimdigi arasynda ornatylyp jatqan yntymaqtastyq memorandýmynyń arqasynda ózara tájirıbe almasý sharalaryn jalǵastyrý múmkindigi bar.
Aıta ketsek, QR PIB Medısınalyq ortalyǵyn damytýdyń 2023-2025 jyldarǵa arnalǵan tujyrymdamasyn júzege asyrý maqsatynda buǵan deıin Shymkent qalasy men Aqmola, Aqtóbe, ShQO, Atyraý oblystarynda 70-ke jýyq operasııa, 400-ge jýyq dárigerlik keńes, 40-qa jýyq dáris oqyldy.