Shybyq shanshysa, jaıqalyp ósetin topyraǵy qunarly Almaty oblysynda kókónis sharýashylyǵy qarqyn alyp, kásibinen násibin taýyp otyrǵandar az emes. Osyǵan oraı óńirde «Kásipke baǵyt» jobasy aıasynda kókónis sharýashylyǵyna oqytý kýrstary aıaqtaldy. Mundaı múmkindikti dıqandarǵa Almaty oblysynyń Kásipkerler palatasy usyndy.
«Kásipke baǵyt» jobasy «Men – kásipker» kásipkerlik áleýetin damytý» quralynyń bir baǵyty retinde qolǵa alyndy. Atalǵan joba shaǵyn jáne orta bıznestiń kásipkerlik áleýetin arttyrý maqsatynda salalyq oqytýdy qamtıdy. «Kásipke baǵyt» jobasy aıasynda óńirde kókónis ósirý, balyq ósirý, omarta sharýashylyǵy, sút jáne et baǵytyndaǵy salalar qamtylady.
Kókónis ósirý boıynsha «Eńbekshiqazaq aýdanynyń jergilikti qoǵamdastyq qory» qoǵamdastyq qorymen 15 kásipker sheberligin shyńdady.
«Biz tórt kúndik tájirıbelik kýrs ótkizdik. Onda teorııalyq materıal alý, sharýa qojalyqtaryn aralaý, kooperatıv múshelerimen jáne olardyń sharýashylyqtarymen tanysý múmkindigi boldy», deıdi qor ókilderi.
Oqytýdyń alǵashqy kúnderi kókónis ósirýshilerge aýyldyq aýmaqtardy damytýda qordyń tájirıbesi, qosylǵan qun tizbegin uıymdastyrý, tutynýshylarmen jumys isteý jáne fermerlermen ózara esep aıyrysý týraly dáris berildi.
Odan ári kýrsqa qatysýshylar jeke jer teliminde plenkaly jylyjaı salýdyń qyr-syryn, daqyldardyń bıologııasyn, tyńaıtqyshtardy qoldaný júıelerin, ósimdikterdi aýrýlar men zııankesterden qorǵaýdy, shyǵyn esebin, basqa da kásipke qatysty san saýaldyń jaýabyn alýǵa tyrysty.
Kókónis ósirýshiler biliktiligin arttyrýmen qatar, osy baǵyttaǵy kásipterin keńeıtýge múmkindik aldy.
«Kýrsty aıaqtaǵan soń qatysýshylar alǵan bilimi men daǵdysy boıynsha test tapsyryp, 70 ball jınaǵan kásipkerler arnaıy sertıfıkat aldy. Sonymen qatar olar oqytqan kásiporynnan úsh aı boıy qoldaý tabady», deıdi Almaty oblysy Kásipkerler palatasyna qarasty Áıelder kásipkerligin damytý ortalyǵynyń menedjer-keńesshisi Dastan Jaılaýbaev.
Almaty oblysy