Memleket basshysy Qazaqstan halqyn Konstıtýsııa kúnimen quttyqtady, dep habarlaıdy Egemen.kz Aqordanyń baspasóz qyzmetine silteme jasap.
Qurmetti otandastar!
Sizderdi Konstıtýsııa kúnimen quttyqtaımyn!
Ata Zań – memlekettiligimizdiń myzǵymas tiregi ári elimizdiń saıası jáne qoǵamdyq qurylysyn, aınymas qundylyqtary men damý jolyndaǵy strategııalyq baǵyt-baǵdaryn aıqyndaıtyn basty qujatymyz.
Jalpyulttyq referendým arqyly jańartylǵan Konstıtýsııamyz ultty uıystyrýdyń naǵyz sımvolyna aınaldy. Sondaı-aq negizgi zańymyz eldiń saıası júıesin demokratııalandyrýdy, zań ústemdigin qamtamasyz etýdi jáne halyqtyń ál-aýqatyn arttyrýdy kózdeıtin aýqymdy ózgeristerdiń berik tuǵyry sanalady. Konstıtýsııalyq sottyń qurylýy – osyndaı ınstıtýsıonaldy reformanyń biri. Bul qurylym azamattardyń quqyqtary men bostandyqtary qorǵalatynyna árdaıym kepildik beretin Ata Zańymyzdyń rólin meılinshe arttyrdy.
Jalpyǵa birdeı jol ashatyn Ádiletti Qazaqstandy qurý úshin Konstıtýsııa qaǵıdalary qatań saqtalyp qana qoımaı, qoǵamnyń sana-sezimine birjola ornyǵýǵa tıis. «Adal azamat» degen atqa laıyq árbir adam Ata Zańnyń bıik murattaryn qoldaıtynyna jáne ony ómirlik ustanymyna aınaldyratynyna nyq senimdimin.
Barshańyzǵa zor densaýlyq, baq-bereke jáne tolaǵaı tabys tileımin!