Oral qalasyndaǵy «Atameken» ordasynda Ata zań kúnine oraı «Konstıtýsııalyq qundylyqtar – memleket pen qoǵam damýynyń negizi» degen taqyrypta dóńgelek ústel ótti.
Is-sharaǵa Batys Qazaqstan oblysy ákiminiń orynbasary Baqytjan Narymbetov, Parlament Májilisiniń Zańnama jáne sot-quqyqtyq reforma komıtetiniń múshesi Marat Báshimov, óńirdiń zııaly qaýym ókilderi, eńbek ardagerleri, oblystyq jáne qalalyq máslıhat depýtattary, úkimettik emes uıymdar men Assambleıa músheleri qatysty.
– Osydan 28 jyl buryn otandastarymyz jańa Konstıtýsııaǵa daýys berip, tarıhı tańdaý jasady. Búginde elimiz demokratııalyq, zaıyrly, órkenıetti qoǵamdy damytý jolynda óz baǵytyn berik ustanyp keledi. Konstıtýsııa elimizdiń egemendigin, bılik pen qoǵamnyń demokratııalyq qaǵıdattaryn bekitip, qoǵam ómiriniń túrli salasynda tabysty ózgeris jasaýǵa baǵdar boldy. Elimizdiń Ata Zańy – ár otandasymyzdyń barsha jetistiginiń negizi, teń quqyǵy men múmkindiginiń kepili. Konstıtýsııaǵa ózgerister engizý jónindegi ótken jylǵy jalpyulttyq referendýmnyń nátıjesi halqymyzdyń birligin jáne elimizdi jan-jaqty jańǵyrtýǵa baǵyttalǵan aýqymdy reformalardyń barynsha qoldaý tapqanyn kórsetti, aıryqsha saıası mánge ıe boldy, – dedi quttyqtaý sóz sóılegen oblys ákiminiń orynbasary Baqytjan Haberuly.
Májilis depýtaty Marat Báshimov te elimizdiń Ata Zańy Ádiletti Qazaqstannyń jetistiginiń berik kepiline aınalǵanyn, tıimdi quqyqtyq júıeni ornyqtyrý arqyly biz ekonomıkalyq ósimge jáne qoǵamnyń ál-aýqatynyń artýyna qol jetkizip, elimizde turaqtylyqty, beıbitshilik pen kelisimdi qalyptastyryp jatqanymyzdy atap ótti. Budan keıin sóz alǵan Batys Qazaqstan oblysy prokýrorynyń mindetin atqarýshy Dáýren Omarǵalıev, M.О́temisov atyndaǵy Batys Qazaqstan ýnıversıteti «Quqyqtyq pánder» kafedrasynyń dosenti, tarıh ǵylymdarynyń doktory Áset Tasmaǵambetov, zań ǵylymdarynyń kandıdaty, oblystyq máslıhattyń depýtaty Mereke Ǵabdýálıev, taǵy basqalar oı-pikirlerin ortaǵa saldy.
Osy kúni oblystyń qoǵamdyq ómiriniń ár salasynda úzdik eńbek etip, kózge túsken bir top azamat oblys ákiminiń Alǵyshatyna ıe boldy. Olardyń qatarynda Aqjaıyq aýdandyq soty ákimshisiniń bas mamany Aınur Temirhanova, Batys Qazaqstan oblysy qorǵanys isteri jónindegi departamenti bastyǵynyń orynbasary, jasaqtaý basqarmasynyń basshysy Albert Bekmuhanov, oblystyń Ádilet departamenti quqyqtyq túsindirý jáne halyqqa zań qyzmet kórsetý bóliminiń bas mamany Aınur Ǵumarova, Bas prokýratýranyń Quqyqtyq statıstıka jáne arnaıy esepke alý jónindegi komıteti Batys Qazaqstan oblysy boıynsha departamentiniń bas mamany Bıbigúl Shanaeva, Oral qalasy prokýratýrasy qoǵamdyq múddelerdi qorǵaý bóliminiń bastyǵy Ázız Nııarov, Terekti aýdandyq polısııa bólimi ýchaskelik polısııa ınspektorynyń kómekshisi Dýlat Aqqaıdarov, Terekti aýdandyq polısııa bóliminiń kámeletke tolmaǵandar ister jónindegi aǵa ýchaskelik polısııa ınspektory Nurhat Dosqalıev, «BQO TJD О́rt sóndirý jáne avarııalyq-qutqarý jumystary qyzmeti» MM kúshter men quraldardy jedel basqarý ortalyǵynyń aǵa dıspetcheri Asqar Bısaqov syndy memlekettik qyzmetshiler bar.
Konstıtýsııa egemendigimizdi, bılik pen qoǵam qurylymynyń demokratııalyq qaǵıdattaryn nyǵaıtyp qana qoımaı, bolashaq tabystar men alǵa qoıylǵan maqsattardy sheshýdiń altyn dińgegi ekeni sózsiz.
Batys Qazaqstan oblysy