Syrtqy ister mınıstrliginde «Qazaqstan – sheteldik BAQ kózimen» dástúrli halyqaralyq baıqaýynyń jeńimpazdary marapattaldy. Is-sharany Syrtqy ister mınıstrligi Bas redaktorlar klýby, «Kazakh Tourism» Ulttyq kompanııasy» AQ jáne Azııadaǵy ózara is-qımyl jáne senim sharalary jónindegi keńestiń (AО́SShK) Hatshylyǵymen birlesip uıymdastyrdy.
Segizinshi ret ótkizilip otyrǵan baıqaýda Ázerbaıjan, Vetnam, Ispanııa, Italııa, Kanada, Malaızııa, О́zbekstan jáne Efıopııadan kelgen basylymdar men reportajdardyń avtorlary ár atalym boıynsha úzdik dep tanyldy. Jarııalanymdar Qazaqstannyń jahandyq ilgerileýi men ınvestısııalyq áleýetin, mádenıetin, sondaı-aq halyqaralyq beıbitshilik pen qaýipsizdikti qamtamasyz etýdegi AО́SShK róli sekildi taqyryptardy qamtydy.
Jeńimpazdardy quttyqtaǵan Syrtqy ister mınıstriniń orynbasary Roman Vasılenko baıqaýǵa usynylǵan búkil jumystyń joǵary deńgeıde ekenin aıtty. Sondaı-aq álemniń túkpir-túkpirinen keletin BAQ ókilder ótinimderi únemi ósip kele jatqanyna nazar aýdardy. Bıyl qazylar alqasynyń qaraýyna álemniń 40 elinen 70-ten astam materıal kelip tústi.
Sondaı-aq R.Vasılenko elimizdiń ıadrolyq qarýdy taratpaý salasyndaǵy bastamalarynyń ózektiligin erekshe aıta kele, is-shara qonaqtaryna otandyq sýretshi jáne antııadrolyq qozǵalys belsendisi Káripbek Kúıikovti tanystyrdy. Osy is-shara aıasynda mınıstrliktiń foıesinde sýretshiniń kórmesi kópshilikke usynyldy.
Dıplomat Qazaqstan Respýblıkasynyń Eýropa men Azııa arasyndaǵy saýda-ekonomıkalyq jáne kólik-logıstıkalyq baılanystardy nyǵaıtýdaǵy róline, eldiń jahandyq yntymaqtastyq pen ekonomıkalyq ózara is-qımyldy jolǵa qoıý jónindegi kúsh-jigerine egjeı-tegjeı toqtaldy. Osy turǵyda Qazaqstan «orta derjavalar» arasyndaǵy dıalogke járdemdesetin, polıarızasııa men buryn-sońdy bolmaǵan geosaıası syn-qaterler dáýirinde «beıbitshilik, progress jáne yntymaqtastyq úshin daýystardy kúsheıtýdiń» jolserigi bola otyryp, Astana halyqaralyq forýmyn ótkizýge bastamashy bolǵanyn jetkizdi.
Saltanatty is-sharaǵa Bas redaktorlar klýbynyń prezıdenti Bıbigúl Jeksenbaı, AО́SShK áskerı-saıası ólshem sarapshysy, elshi Dýlat Qýanyshev, Mádenıet jáne sport vıse-mınıstri Erjan Erkinbaev, «Kazakh Tourism» Ulttyq kompanııasy» AQ Basqarma tóraǵasynyń orynbasary Qaırat Sádýaqasov, sondaı-aq Ázerbaıjan, Vetnam, Ispanııa, Italııa, Kanada, Malaızııa jáne О́zbekstan elshileri men dıplomattary qatysty.
Baıqaýdyń barlyq qatysýshylaryna alǵysyn bildire otyryp, B.Jeksenbaı sheteldik BAQ-ta jarııalanǵan Qazaqstan týraly materıaldar memlekettiń sheteldegi ımıdjin ilgeriletýge jemisti áser etetinin jetkizdi. D.Qýanyshev óz kezeginde AО́SShK atalymy boıynsha eki jeńimpazdyń jumysyn erekshe atap ótti. Sonymen qatar osy forýmdaǵy Qazaqstan tóraǵalyǵynyń basymdyqtaryn áńgimelep berdi.
Kanadalyq jýrnalıst Donovan Makkenzı óz eli men Qazaqstan arasyndaǵy uqsastyqtardy atap ótti. Etnosaralyq jáne dinaralyq kelisim, iri derjavalarmen kórshilestik, belsendi jáne bastamashyl syrtqy saıasat sekildi ortaq qasıetimiz bar ekenin jetkizdi. «The Voice of Vietnam» Vetnam ulttyq radıosynyń tilshisi Sýan Ngýen barlyq qatysýshynyń atynan Qazaqstanǵa kelý múmkindigi úshin rızashylyǵyn aıtty. Eki el halyqtary arasyndaǵy dostyqtyń nyǵaıatynyna, Qazaqstanǵa týrısterdiń artatynyna úmit bildirdi.