Almaty qalasyn damytýdyń 2025 jylǵa deıingi baǵdarlamasyn iske asyrý jónindegi jol kartasy jáne 2030 jylǵa deıingi orta merzimdi perspektıvalardy oryndaý sheńberinde Bilim basqarmasynyń qalalyq bilim berýdegi jańa tehnologııalardyń ǵylymı-ádistemelik ortalyǵy janynan mektepke deıingi resýrstyq ortalyq qurylǵan bolatyn. Ortalyq mamandary balabaqsha tárbıeshilerin ádistemelik turǵydan súıemeldeı otyryp, búgingi tańda bala tárbıesine qatysty týyndaǵan kókeıkesti máselelerge oraı keńes beretin bolady.
Búginde qaladaǵy 919 mektepke deıingi tárbıe uıymdarynda 79 600 bala bilim alyp jatyr. Olardyń 194-i memlekettik bolsa, 725-i jekemenshik balabaqshalar sanatynda.
Almaty qalalyq bilim basqarmasynyń deregine súıensek, shaharda balabaqsha kezegindegi 3 jastan 6 jasqa deıingi balalar sany 18 118-ge teń. Osy máseleni sheshý úshin jergilikti bıýdjetten qarjy qarastyrylyp, 6 255 oryndyq 80-ge jýyq balabaqsha ashý josparlanyp otyr. Onyń 75-i jekemenshik balabaqsha bolsa, qabyldanatyn balalar sany 5 395-ti quraıdy. Al 4 memlekettik balabaqshaǵa 860 balany ornalastyrý kózdelgen. Búginde qala boıynsha 2 630 orynǵa arnalǵan 47 balabaqsha ashylǵan, onyń 1-i 300 orynǵa arnalǵan memlekettik, al 46-sy jekemenshik balabaqsha tizimine kiredi.
Sonymen qatar bıyl jekemenshik balabaqshalarǵa jergilikti bıýdjet esebinen memlekettik tapsyrys boıynsha 5 myń orynǵa qarjy bólingen. Jekemenshik balabaqshalarda memlekettik tapsyrys boıynsha 3 801 bala qamtylsa, memlekettik bilim berý tapsyrysyna sáıkes 635 jekemenshik mektepke deıingi uıymda 40 995 balany qamtyp otyr.
Osy sharalardyń nátıjesinde 3 jastan 6 jasqa deıingi balalardy mektepke deıingi tárbıe jáne bilimmen qamtý 93,5 paıyzdy qurap, jyldyń sońyna deıin bul kórsetkishti 95 paıyzǵa jetkizý kózdelgen. Jańa oqý jylynan bastap memlekettik mektepke deıingi uıymdarda halyqtyń áleýmettik osal toptarynyń otbasylarynan shyqqan 5 myńnan astam bala tegin tamaqpen qamtamasyz etiletin bolady. Qaladaǵy oryn tapshylyǵyn sheshý úshin ákimdik iri qurylys kompanııalarymen áleýmettik áriptestikti damytyp, keler jylǵa qaraı 2100 balaǵa arnalǵan 11 balabaqsha ashý josparlanǵan.
ALMATY