Qostanaıdaǵy Abaı mektebiniń 10-synyp oqýshysy, jas boksshy Aıdos Úsenov Rıo-de-Janeıro qalasynda ótken dúnıejúzilik jazǵy gımnazıada oıyndarynyń chempıony atandy. Jeńimpazdy áýejaıdan ata-anasy, óńirdiń sport ardagerleri, ustazdary men synyptastary kútip aldy.
Aıdos Qostanaıǵa byltyr ata-anasymen birge Soltústik Qazaqstan oblysynan kóship kelgen. Alǵash Petropavldaǵy daryndy balalarǵa arnalǵan sport mektebinde oqyǵan jas daryn sodan beri talaı halyqaralyq jarysty jeńip aldy. Soltústik Qazaqstan, Qostanaı oblystarynyń chempıony boldy. A.Mıroshnıchenko atyndaǵy halyqaralyq týrnırdiń bas júldesin utyp aldy. Endi, mine, Brazılııa tórinde ótken halyqaralyq boks básekesinde 46 kıloda jeńimpaz atanyp, elimizdiń mereıin asyryp otyr.
Aıdosty alǵash sport mektebine ákesi Serikbaı Úsenov jetektep aparypty. «Odan ári qaraı aǵalaryna qarap ósti. Eki aǵasy da bokspen shuǵyldanady, ekeýi de sport sheberligine úmiker. Balamdy búginde ustazy Janat Batyruly jattyqtyryp júr», deıdi Serikbaı.
Abaı mektebi dırektorynyń tárbıe isi jónindegi orynbasary Jasulan Bekentaev pen jas chempıonnyń synyp jetekshisi Aınur Orazhanqyzynyń aıtýynsha, Aıdos Úsenov mekteptiń qoǵamdyq jumystaryna da belsendi atsalysatyn, sabaq úlgerimi joǵary, úlgili shákirt.
Qostanaı oblysy