Jańa oqý jylynda 190 myń jas kolledj stýdenti atandy, onyń 133 myńy memlekettik bilim berý tapsyrysy boıynsha oqıdy. Kásiporyndardyń ótinimi boıynsha 10 myń stýdent bilim alady, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
Memleket basshysynyń tapsyrmasy boıynsha bıyl memlekettik bilim berý tapsyrysy 50 myń orynǵa ulǵaıtyldy. Tehnıkalyq jáne kásiptik kolledj stýdentteriniń 75 myńy kvota boıynsha qabyldandy.
Aıta ketý kerek, memlekettik tapsyrys tehnıkalyq mamandyqtarǵa qaıta baǵdarlandy. Olardyń qatarynda geologııa, energetıka, metallýrgııa, mashına jasaý, kólik, IT, qurylys, pedagogıka jáne medısına sııaqty salalar bar.
Kolledj stýdentterin yntalandyrý maqsatynda 2023 jyldyń qyrkúıeginen bastap stıpendııany kezeń-kezeńimen arttyrý qarastyrylǵan: 2023 jyldyń 1 qyrkúıeginen bastap 50% ósedi, 2024 jyly 100%-ǵa deıin jetkiziledi. Memlekettik tapsyrys boıynsha oqıtyn stýdentter áleýmettik qoldaýmen, onyń ishinde stıpendııamen, tamaqtanýmen jáne jolaqymen qamtylǵan. Sondaı-aq jańa oqý jylynda kolledj stýdentteri úshin 2,5 myń oryndyq 13 jańa jataqhana ashylady.