Memleket basshysy Qasym-Jomart Toqaev búgingi «Ádiletti Qazaqstannyń ekonomıkalyq baǵdary» atty Joldaýynda iri óndiris oryndarynyń ekologııaǵa zııan keltirip jatqanyn, kásiporyndarda jumysshylardyń mertigip, qazaǵa ushyraýy jıilegenin synǵa aldy, dep habarlaıdy Egemen.kz.
«Qazaqstanda ken óndirý ónerkásibi jaqsy damyǵany barshaǵa belgili. Osy sala ulttyq ekonomıkanyń ósimin qamtamasyz etetin senimdi tabys kózi bolyp keledi. Bolashaqta da solaı bolýǵa tıis. Kóptegen metaldyń álemdik naryqtaǵy baǵasy buryn-sońdy bolmaǵan deńgeıge jetti. Soǵan qaramastan iri óndiris oryndaryna jaqyn turatyn jurttyń narazylyǵy kúsheıip barady. Olar ekologııa nasharlap, densaýlyqqa zııan keltirip jatqanyn aıtyp, shaǵymdanýda», dedi Memleket basshysy.
Budan soń ol jumysshylardyń óndiriste mertigýi jáne qazaǵa ushyraýy kóp bolyp ketkenin aıtty.
«Úkimet kásiporyndardyń tehnologııalyq jáne ekologııalyq ahýalyn, densaýlyq saqtaý júıesin jaqsartý úshin batyl sharalar qabyldaýy qajet. Sondyqtan iri óndiris kásiporyndary 5 jyl saıyn tehnologııalyq jáne ekologııalyq aýdıt jasaýy kerek. Bul talap ınfraqurylym salasyndaǵy kásiporyndarǵa da qoıylýǵa tıis», dedi Prezıdent.