Astana qalasynyń ákimi Jeńis Qasymbek Instagram paraqshasynda Prıgorodnyı eldi mekeniniń turǵyndarymen kezdesý barysynda kóterilgen máseleler týraly jazdy, dep habarlaıdy Egemen.kz elorda ákimdiginiń baspasóz qyzmetine silteme jasap.
«Aýdandarymyz ben eldi mekenderimizdiń turǵyndarymen turaqty kezdesip turamyn. Prıgorodnyı eldi mekeniniń (Esil aýdany) turǵyndarymen kezdestim. О́tken kezdesýdiń qorytyndysy boıynsha biz «Jol kartasyn» jasaǵan edik, onda 30-dan asa túrli másele qarastyryldy. Búgingi kezdesýde osy máselelerge jan-jaqty sholý jasaldy: 19 másele sheshildi, taǵy 12-sin sheshý jumysy júrip jatyr. Kezdesýde turǵyndar ózekti máseleler kóterdi: joldar, aýlalar men qoǵamdyq keńistikter salý, apatty jaǵdaıdaǵy eski turǵyn úılerdi buzý, gazdandyrý, áleýmettik nysandar salý jáne t.b», dep jazdy bas qala ákimi.
Jeńis Qasymbektiń jazýynsha, 2024-2025 jyldary ulttyq joba aıasynda Astanada 24 jaıly mektep salynady. Onyń 15-i Esil jáne Nura aýdandarynda ornalasady, sol sııaqty jańa formattaǵy mektep Prıgorodnyı eldi mekeninde de bolady.
«Sonymen qatar kezdesý barysynda turǵyndar basseın máselesin kóterdi. Qalada basseınge degen qajettilik bar. Aldaǵy 3 jylda Memleket basshysynyń tapsyrmasyna sáıkes 15 oqýshylar saraıyn salýdy josparlap otyrmyz. Olardyń biri Prıgorodnyı eldi mekeninde ornalasady, tıisinshe onda basseın de bolady», dep jazdy ákim.
Eldi mekenderdegi ózekti máselelerdiń biri – apatty jaǵdaıdaǵy tozyǵy jetken turǵyn úılerdi buzý. Jeńis Qasymbek 2024 jyly mundaı úılerden taǵy 700 turǵyndy kóshirý josparlanyp otyrǵanyn atap ótti.
«Búgingi turǵyndarmen kezdesýden keıin eń aldymen qandaı máselelerdi sheshýimiz kerek ekenin anyqtaıtyn bolamyz», dep túıindedi elorda ákimi.