Jańa mektep ǵımaraty aýyldyń ajaryn asha túseri anyq. Syrtqy kelbeti de, ishki dúnıesi de zamanaýı úlgidegi nysannyń kórkin balalardyń rııasyz kúlkisi eseleıdi. Túlkibas aýdanyndaǵy Eńbekshi aýylynda tozyǵy jetken mekteptiń máselesi birneshe jyldan beri sheshimin tappaı kelgen bolatyn. Bıyl oqýshylar jańa oqý jylyn jańa mektepte bastaýǵa múmkindik aldy. «Aýyl – el besigi» baǵdarlamasy aıasynda salynǵan mektep el ıgiligine paıdalanýǵa berildi.
Jańa oqý jyly qarsańynda qurylysy aıaqtalǵan mekteptiń syıymdylyǵy 150 oqýshyǵa laıyqtalǵan. Memlekettik standartqa saı keletin mektepte arnaıy lıngofon, mýltımedııa bólmeleri, qyzdar men uldarǵa arnalǵan zamanaýı úlgidegi sheberhana jáne 13 pándik kabınet bar. Sonymen birge májilis, sportzaly, kitaphana, pedagog-psıhologterdiń jeke kabınetteri men 50 orynǵa shaqtalǵan ashana men medısınalyq bólme jáne ishki ájethana qarastyrylǵan.
Jyl sońyna deıin aýdanda taǵy eki mektepte qosymsha ǵımarattyń qurylysy aıaqtalyp, paıdalanýǵa beriledi. Halyq sanynyń artýyna baılanysty, sondaı-aq balalardy sapaly bilimmen qamtý maqsatynda Taýsaǵyz aýylyndaǵy mektepke qosymsha 150 oryndyq ǵımarat qurylysyna jáne T.Rysqulov aýyly «Baqybek» shaǵyn aýdanynan salynyp jatqan 300 oryndyq mekteptiń qurylysyna qarjy bólinip, búginde qurylys jumystary qarqyndy júrgizilip jatyr. Sonymen qatar Yntymaq aýyly A.Orazbaeva atyndaǵy orta mektepke kúrdeli jóndeý jumystary júrgizilip, bıyl paıdalanýǵa beriledi. Aýdanda 2023-2025 jyldary 4 jańa mekteptiń jáne 2 qosymsha ǵımarattyń qurylysyn júrgizý josparlanyp otyr.
Sondaı-aq aýdanda «Aqmeıir» balalardy damytý ortalyǵy ashyldy. Ortalyqta erekshe kútimdi qajet etetin balalarǵa logoped-defektolog, artterapııa, mýzterapııa, pedogogıkalyq-psıhologııalyq túzetý kabınetterinde bilikti mamandar óz qyzmetterin tegin kórsetetin bolady. «Samruk-Kazyna Trust» korporatıvtik qorynyń qoldaýymen júzege asqan joba arqyly 150 balany qamtý josparlanǵan. Munda birinshi kezekte ata-ananyń qaraýynsyz qalǵan, kópbalaly jáne az qamtylǵan otbasylardyń balalaryna basymdyq berilmek.
Bilim kúni Saýran aýdanynda №2 jalpy bilim beretin mektep paıdalanýǵa berildi. Jańa mekteptiń ashylý saltanatynda oblys ákiminiń orynbasary Beısenbaı Tájibaev jyl sońyna deıin 37 mektepti paıdalanýǵa berý josparlanǵanyn atap ótti. Al Saryaǵash aýdanynda zamanaýı úlgidegi 300 oryndyq jańa mektep Aqjar aýyldyq okrýgi Baǵys eldi mekeninde ashyldy. Ǵ.Muratbaev atyndaǵy bilim uıasynyń qurylysy byltyr bastalǵan. Mektepte oqýshylardyń alańsyz bilim alýyna qolaıly jaǵdaı jasalǵan, sý jáne sanıtarlyq baılanys qubyrlary ortalyqtandyrylǵan. Sondaı-aq hımııa, fızıka, eńbek jáne ınformatıka kabınetteri tolyqtaı zamanaýı qural-jabdyqtarmen jáne ınteraktıvti taqtamen jabdyqtalǵan. Tigin úıirmesine arnalǵan bólme, keń sportzaly, ashana jáne medısınalyq bólmesi bar. О́rtke qarsy dabyl qaqqysh, syrtqy jáne ishki beınebaqylaý kameralary, jedelsaty da ornatylǵan.
Oryn tapshylyǵyn azaıtýǵa jekemenshik mektepterdiń de qosar úlesi qomaqty bolmaq. Mysaly, bıyl Saıram aýdanynda 3 566 oryndyq 7 jekemenshik mektep ashylady dep josparlanǵan. Jalpy, 7 962 muǵalim jumys isteıtin, 64 myńnan asa oqýshy bilim alatyn aýdan jekemenshik mektep salýdan óńirde aldyńǵy orynda keledi. Kentaý qalasynda da zamanaýı úlgidegi jekemenshik «Grant high school» mektebiniń lentasy qıyldy. 250 balaǵa arnalǵan bilim oshaǵynda ár oqýshynyń tańdaǵan baǵytyna qaraı pánderi tereńdetilip oqytylady. Sondaı-aq balaǵa túske deıin belgilengen keste boıynsha sabaq oqytylsa, tústen keıin mamandyqqa beıimdelgen bilim berý júıesi boıynsha sabaq júrgiziledi. Jekemenshik mektepte balalardyń bilim alýyna barlyq jaǵdaı jasalǵan.
Túrkistan oblysynda 35 myń orynǵa tapshylyq bar. Atalǵan máseleni sheshý maqsatynda 33 mekteptiń qurylysyn júrgizýge túrli qarjylandyrý kózinen 23,6 mlrd teńge qarastyrylǵan. Onyń ishinde Bilim ınfraqurylymyn qoldaý qory arqyly bıyl 9 mekteptiń qurylysy júrgizilip jatyr. Budan bólek, «Jaıly mektep» jobasymen 3 jylda 63 mektep salynady.
Túrkistan oblysy