Jetisýdaǵy jańa mektepter

Qaratal aýdanyna qarasty K.Toqaev orta mektebi men Kálpe orta mektebi kúrdeli jóndeý jumystarynan keıin oqýshylarmen qaıta tabysyp otyr. Birneshe aı esigi jabyq turǵan oqý ordasy Bilim kúninde shákirtterine qýanysh syılady. Odan keıin gýmanıtarlyq kolledj ashylyp, jas talapkerlerdi qabyldady.

K.Toqaev orta mektebiniń jobalyq qýattylyǵy 640 oryndyq, 900 bala bilim alady. 2022 jyly 200 oryndyq qosymsha ǵımarat salynǵan. Bıyl K.Toqaev qory arqyly «BI Group» kompanııasy negizgi ǵımaratqa tolyq jóndeý jumystaryn júrgizip, materıaldyq-tehnıkalyq turǵydan tolyq jańartyldy. Zamanýı pándik kabınetter, ashana, konserttik zal jáne sport zaly jasaqtaldy. So­ny­men qatar kitaphana, trenajer zaly, mýltımedıalyq kabınet, IT kabınet, medıateka kabınetterimen jabdyqtaldy. Jańa oqý jylynda 905 oqýshy, onyń ishinde 1-synypqa 74 búldirshin mektep tabaldyryǵyn attady.

Al kolledj qurylysy ótken qarasha aıynan bastap júrgizilgen. 100 talapkerge arnalǵan bilim mekemesiniń 30 oryndyq jataqhanasy bar. Qurylystyń jalpy quny 1,641 mlrd teńgeni qurady. Kolledj ishi kitaphana, trenajer, sport jáne konserttik zaldarmen jabdyq­tal­ǵan. Bıylǵy oqý jylynda «Mektepke deıingi tárbıe jáne oqytý», «Bastaýysh bilim berý pedagogıkasy men ádistemesi» mamandyqtary boıynsha 50 bilim alýshy, qabyldandy.

Al Kálpe aýylyndaǵy mekteptiń kúr­deli jóndeý jumystaryna 1,6 mlrd teńgege jýyq qarjy jumsalǵan. Mektepte 234 oqýshy, 30 muǵalim bar. О́tken oqý jylyndaǵy bilim sapasyn baqylaý kórsetkishi 65 paıyzdy quraǵan. Jóndeý jumystary kezinde balalar kórshi aýyldaǵy mektepte bilim aldy. Kúrdeli jóndeý aıasynda materıaldyq-tehnıkalyq bazasyn jańartýǵa bıýdjetten 101 mln teńge qarastyrylyp, qajetti zattar tolyq satyp alynǵan.

Jalpy, Kálpe orta mektebiniń irgesi 1970 jyly qalanǵan, joba­lyq qýattylyǵy – 960 oryn. Mektep ǵı­ma­ratyn tıimdi paıdalaný, bala­lar­dyń bos ýaqytyn durys uıymdastyrý maqsatynda qosymsha 50 oryndyq shaǵyn ortalyq (tolyq merzimdik) jáne 640 balaǵa arnalǵan balalar shyǵarmashylyq ortalyǵy ashyldy. Ortalyq mýzyka, sýret jáne kompıýterlik grafıka sabaqtaryna qajet zattarmen tolyq jabdyqtalǵan. Mektepte ashana, sport jáne akt zaldary, jeke sport alańdary bar stadıon ornalasqan. Sonymen qatar mektep aýmaǵynda 50 oryndyq balabaqsha da paıdalanýǵa berildi. О́tken oqý jylynda jańa modıfıkasııaly fızıka, hımııa, bıologııa kabınetteri satyp alynyp, mektep kitaphanasy modernızasııadan ótken eken.

Al Kóksý aýdanyna qarasty Bes­qaı­nar orta mektebi júzden astam oqý­shy qabyldaı alady. Mektepke deıingi shaǵyn ortalyǵy bar jańa oqý ordasy zamanaýı jıhazdarmen, ınterak­tıvti paneldermen qamtamasyz etilgen. Odan bólek, oqý kabınetteri barlyq qajetti qural-jabdyqtarmen jabdyqtalǵan. Mektep aýmaǵy abattandyrylǵan, fýtbol stadıony, hokkeı alańy, vorkaýt alańy, balalarǵa arnalǵan oıyn alańy bar. Qaýipsizdik maqsatynda beıne­ba­qylaý ornatylǵan. Bilim ordasyndaǵy 12 synyptyq jınaqta 140 oqýshy oqıdy.

Qazaqstannyń 10 jyldyǵy aýylynda 25 oryndyq shaǵyn ortalyǵy bar 120 oryndyq orta mekteptiń qurylysy aıaqtalyp, qoldanysqa berildi. Mektep­tiń eski ǵımaratynda nebári 7 oqý kabı­ne­ti bolǵan edi. Merekelik is-shara­lar ótetin akt jáne sport zaldary bol­maǵan. Qazir bul másele sheshimin taýyp, materıaldyq-tehnıkalyq bazasy tolyǵymen jańartyldy. Ǵımarat syrty tolyq abattandyrylyp, fýtbol stadıonymen, jattyǵý alańdarymen jáne oıyn bólmesimen tolyqty. Mektepte 81 oqýshy oqıdy.

Sonymen qatar Kerbulaq aýdanyna qarasty Saryózek aýylyndaǵy №49 mek­tep kúrdeli jóndeýden ótti. Qurylysy ótken jyldyń maýsym aıynda bastalǵan 780 oryndyq mektepke 727 mln teńgege jýyq qarajat bólingen edi. Mektepte 1-11-synyp aralyǵynda 878 oqýshy bilim alady, 48 synyp jınaǵy qurylǵan.

Aıta keteıik, bıyl Jetisý óńirinde 16 bilim berý nysanynyń quryly­sy júr­gizilip jatyr. 10 nysandy paıda­la­nýǵa berý josparlansa, qalǵany el ıgiligine berildi. Búginde onyń úsheýi merziminen buryn ashyldy. Oblys bo­ıynsha 69 eldi mekennen 1766 oqýshy tasymaldanady. Bıyl 604,2 mln teńgege qosymsha 12 avtobýs satyp alý josparlansa, onyń 7 avtobýsy jýyrda bilim berý uıymdaryna berildi. Qalǵan 5 avtobýs jyl sońyna deıin jetkiziledi.

Oblystyq bilim basqarmasynyń máli­metinshe, jalpyǵa birdeı bilim berý qorynan jekelegen sanattaǵy 23 486 oqý­shyny mektep formasymen jáne oqý-ádistemelik quraldarmen qamtamasyz etýge 1 mlrd teńgege jýyq qarajat bó­lin­gen. Sondaı-aq jańa oqý jylynda 52 myń bastaýysh synyp oqýshysy te­gin ystyq tamaqpen qamtylady. Bul maq­sat­qa jergilikti bıýdjetten 1,7 mlrd teńge qarastyrylyp otyr. О́ńirde 130 myń oqýshy oqıdy. Al birinshi synypqa 13 500 oqýshy qadam basty.

Jetisý oblysy