Oralbek Qabóke shyǵarmalary otbasy qundylyqtarynyń qadir-qasıetin tereńnen sezinýge shaqyrady. Onyń qalamynan tamǵan syrly boıaýlar janyńa ózgeshe jyly ushyraıtyny sondyqtan. Sýretshi óz kartınalaryna taqyryp izdep, qııadan asyp, el shetine shyǵyp ketpeıdi. О́mir men bolmystyń zańdylyqtaryn ata dástúrden, ulttyq turmystyń ǵasyrlar boıy synnan ótip, dáleldengen qarym-qatynasynan, adam jan-dúnıesiniń yrǵaqtarynan izdeıdi.
Kez kelgen sýretshiniń tisi bata bermeıtin tyń taqyryptarǵa boı aldyrǵan qylqalam ıesi ónerdi ómirim dep biledi. Kıeli ónerdiń kıesin ketirmeý, tunyǵyn laılamaý sýretshiniń basty urany. Jas sýretshiniń shyǵarmalary jyldar jyljyp, ǵasyrlar almassa da otbasyndaǵy jarasym men jylylyq, saǵynysh pen qamqorlyq syndy izgi sezimder óz bıiginde qala beretinin dáleldeıdi. Kóz aldyńdaǵy jansyz beıneden áldeqashan ómirden ótken atań men ájeńdi kóresiń. Kóńil túkpirinde qattalyp qalǵan saǵynysh qaıta qozdaıdy. Júrek qylyn shertken arman-tilek máńgilik ańsarǵa ulasyp, jan-dúnıeńdi shymshylaıdy. Osy zamanǵy óner tiline saı ótkir de ótimdi týyndylar qylqalam sheberiniń únemi izdenis ústinde júretinin ańǵartady. О́nertanýshylar Oralbek sýretteri ónege men kıeni ózara úndestirip, ýaqyt pen zaman tynysyna saı bere bilýimen erekshelenedi dep esepteıdi.
– Bul kúnderi ónerdiń órisi qandaı keń bolsa, onyń beıneleý múmkindikteri de, obrazdyq paıymdaýlary da sonshalyqty mol ádis amaldardan turady. Oralbek qoltańbasynyń basty ereksheligi – taqyryptyq, kóp beıneli kartınalarǵa qalam terbeýi. Ol ádemi peızajdy etıýdtermen keskini kelgen portrettermen kórermendi aldaýsyratpaı kesek, qabyrǵaly týyndylar arqyly óz oıyn azamattyq kelbeti men kózqarasyn kórsetkisi keledi. Árbir kartına sýretkerdiń jazylyp qoıǵan minezdemesindeı dúnıeler. Solar arqyly kórermen sýretshini tanyp biledi, oǵan degen kózqarasy qalyptasady, qarym – qatynas jasaı bastaıdy. Sóıtip óner áleýmettik qajettilikke ıe bolady. Oralbek ónerdiń minezin boljap bile almaıtyn, ólshep ómildirik saldyrmaıtyn tazalyq pen adaldyqqa ǵana moıyn usynatyn aq boz tulparynyń jalynan ustaǵan sııaqty, – deıdi ónertanýshy Samal Mamytova.
Myna bir sýrettegi dastarhan basyna jaıǵasqan jarasymdy januıa kishkentaı memleket ispetti. Urpaǵyna ańyzyn shertip, ónegesin órbitip otyrǵan qazynaly qarııa qasıettiń altyn dińgegindeı. Qarııanyń tý syrtyna saıaly báıterektiń beınelenýi áke mártebesin barynsha asqaqtatyp tur. Ár otbasy múshesiniń dastarhan basynan óz jolyna saı oryn alýy qazaq otbasyndaǵy izet pen qurmettiń, kisilik pen kishiliktiń jarqyn úlgisin kórsetedi.
ALMATY