5 qyrkúıek – Qazaqstan halqynyń tilderi kúni. Osy merekege oraı Parlament Senatynyń tóraǵasy Máýlen Áshimbaev Qazaq elin merekemen quttyqtady, dep habarlaıdy Egemen.kz.
«Búgin – ult ustazy Ahmet Baıtursynulynyń týǵan kúni. Osy dataǵa oraı elimizde 5 qyrkúıek Qazaqstan halqynyń tilderi kúni retinde bekitilgeni belgili. Bul eliniń erkindigi jolynda basyn báıgege tikken, týǵan halqynyń zaman kóshinen qalmaýy úshin tól álipbıimizdi jasap, oqýlyqtar jazǵan, sol arqyly qazaq tiliniń damýyna ólsheýsiz úles qosqan tulǵaǵa degen zor qurmettiń jarqyn kórinisi ekeni sózsiz.
Ahmet Baıtursynuly aqyn, til jáne ádebıet salasyndaǵy ǵalym, saıasatker, pýblısıst, pedagog boldy. Ol osy baǵyttardyń bárinde ulttyń bilimin molaıtýǵa bar kúsh-jigerin jumsady. Halqyna «Qyryq mysal» arqyly ún qatyp, qazaǵyn «Masa» bolyp oıatýǵa talpyndy.
Qaıratker tulǵa qazaq til bilimi men ádebıettaný ǵylymdarynyń negizin qalap, mańyzdy oqý quraldaryn jazdy. Onyń jetekshiligimen tuńǵysh jalpyulttyq «Qazaq» gazeti jaryq kórgeni barshaǵa aıan.
Ult ustazynyń saıası qaıratkerlik qyry da bir bólek. Ahań ult kósemi Álıhan Bókeıhanmen jáne Mirjaqyp Dýlatulymen birge Alash qozǵalysynyń aldyńǵy leginde turdy. Osylaısha ultymyzdy qalamgerligimen de, qaıratkerligimen de egemendikke jeteledi.
Osyndaı ardaqty arysymyzdyń esimin umytpaý, ult sanasynda jańǵyrtyp otyrý – barshamyzǵa ortaq mindet. Soǵan oraı byltyr Prezıdentimiz Qasym-Jomart Kemeluly Toqaevtyń tapsyrmasymen elimizde Ahmet Baıtursynulynyń 150 jyldyq mereıtoıy keń kólemde atalyp ótkeni belgili. Aldaǵy ýaqytta da birtýar tulǵanyń mol murasy men ónegeli ómirin dáripteıtin tyń bastamalar iske asyryla beredi. Oǵan búgingi ataýly kún de óz septigin tıgizetini anyq. Endeshe ulttyq múddeni kózdeıtin Tilder kúni qutty bolsyn! Ana tilimizdiń aıasy keńeıe bersin!» delingen M.Áshimbaevtyń quttyqtaýynda.