Almaty oblysyna jumys saparymen kelgen Prezıdentke Qonaev qalasynyń Bas jospary tanystyryldy, dep habarlaıdy Egemen.kz Aqordanyń baspasóz qyzmetine silteme jasap.
«Ýrbostıl» JShS dırektory Lıýbov Nysanbaeva Memleket basshysyna oblys ortalyǵynyń aýmaǵy 2050 jylǵa qaraı 19 myń gektarǵa ulǵaıyp, halyq sany 200 myń adamǵa jetedi degen boljam jasalyp otyrǵanyn aıtty.
Qalany damytý jáne jańa mádenı-qoǵamdyq ortalyq salý úshin «Jańa-Ile» alańy tańdalyp alyndy. Onda áleýmettik-turmystyq, mádenı, turǵyn úı, bilim berý jáne rekreasııalyq nysandar salý kózdelgen.
Júıe quraýshy klasterler men kásiporyndarda 20 myńnan astam jumys ornyn ashý josparlanyp otyr. Bul 30 myńnan astam adamdy jumyspen qamtıtyn kóptegen shaǵyn jáne orta bıznes sýbektisiniń qurylýyna yqpal etedi.
Budan bólek, Almaty oblysynyń ákimi Marat Sultanǵazıev Memleket basshysyna qoǵamdyq jaǵajaıdy abattandyrý jobasyn tanystyrdy.
Ákimniń aıtýynsha, biregeı jobanyń – uzyndyǵy 1000 metr bolatyn sý promenadynyń qurylysy bastalady. Ony aldaǵy ýaqytta 3000 metrge deıin jetkizý kózdelgen.
Kezdesý barysynda oblys basshysy óńirdi sıfrlandyrý máselesine erekshe nazar aýdardy.
Prezıdentke 67 áleýmettik nysandy joǵary jyldamdyqpen jumys isteıtin ınternetke qosý jobasynyń júzege asyrylýy, sondaı-aq 5G jobasyn odan ári iske asyrý úshin jalpy uzyndyǵy 104 shaqyrym talshyqty-optıkalyq baılanys jelisiniń tóselýi jóninde málimet berildi.
Qaladaǵy qoǵamdyq qaýipsizdikti úzdiksiz monıtorıng jasaý maqsatynda 412 beınebaqylaý kamerasy ornatylyp jatyr. Almaty oblysynyń mektepterinde qaýipsizdiktiń ıntegrasııalanǵan júıesin qurý atalǵan bastamalardyń mańyzdy bóligi sanalady. Joba aıasynda oblystyń 125 mektebine Jedel basqarý ortalyǵyna qosylǵan 4 myń kamera ornatylady. Bul platforma yqtımal qaýipterge qarsy jyldam áreket etýge jáne qolaıly bilim berý ortasyn qurýǵa múmkindik beredi.