Elimizdegi EEGERU zamanaýı mýzyka ansambli álemdegi eń iri óner festıvali – Edinburgh Festival Fringe-de (Edınbýrg Frındj) óner kórsetti.
Shotlandııa astanasyndaǵy festıval qalyptasqan dástúr boıynsha tamyz aıynda úsh apta boıy ótkizilip, kórinisteri men konsertterin jyl saıyn eki mıllıonǵa jýyq kórermen tamashalaıdy. Atalǵan festıval kórermenderiniń nazaryna Qazaqstan óneri alǵash ret usynyldy. EEGERU ansambliniń festıvalge sapary «Dara» qaıyrymdylyq qory qoldaýymen uıymdastyryldy.
EEGERU konserti Queen’s Hall sahnasynda ótip, ansambl qazaqstandyq kompozıtorlardyń shyǵarmalaryn, sondaı-aq sheteldik avtorlardyń birneshe kompozısııasyn oryndady. Atap aıtqanda, Edınbýrgte alǵash ret Qýat Shildebaevtyń «Qarakemer» jáne Artyq Toqsanbaevtyń My Respect to You, Mr. Tattimbet týyndylary oryndaldy. Konserttiń erekshe nómiri – shotland kompozıtory Kler Djonstonnyń EEGERU ansambli úshin arnaıy jazǵan Call of The Mountains kompozısııasy. Kompozıtor shyǵarmasyna tek klassıkalyq akýstıkalyq jáne sıfrlyq aspaptardy ǵana emes, sondaı-aq qazaq qylqobyzyn da qosqan.
Sonymen qatar konsertten keıingi kúnderi – 28-29 tamyzda, EEGERU-diń erekshe qajettilikteri bar mýzykanttar men kompozıtorlardyń múmkindigin keńeıtýmen aınalysatyn Shotlandııanyń jetekshi ınklıýzıvti óner uıymy Drake Music Scotland-ta óner kórsetti. Qazaqstan ártisteri shotlandııalyq áriptesterine sheberlik sabaǵyn ótkizip, olardy qyl-qobyz ulttyq aspabymen, onyń múmkindikterimen tanystyrdy.
«Osyndaı aýqymdy festıvalde óner kórsetý bizdi jigerlendiredi ári ınklıýzıvti mýzykalyq bilim berýde sheteldik áriptesterimizden tájirıbe alýǵa jol ashady. Qazirgi álemdegi ınklıýzıvti oqytý jańa tehnologııalarmen tikeleı baılanysty jáne shotland mýzykanttary bul baǵytty kóptegen jyl boıy damytyp keledi. Qazaqstanda ınklıýzııa máselelerimen júıeli túrde «Dara» qory aınalysady. Biz shotland mýzykanttary men mýzyka áýesqoılarynyń qazaq mýzykasyna degen qushtarlyǵyn oıata aldyq degen úmittemiz», deıdi EEGERU ansambliniń dırektory Raýshan Jumanııazova.