Túrkistan oblysynyń Keles aýdanyna qarasty Bozaı aýylynda turatyn III top múgedektigi bar Ábdijappar Mahmutbekov tiginshilikti óziniń kásibi etip, osy kúnderi quraq qurap, kıim jáne at jabdyqtaryn tigýmen aınalysady, dep jazady Egemen.kz.
Ol qarshadaıynan sýret salýǵa qyzyǵyp, keıinnen dızaıner bolýdy armandaǵan. Ábdijappar Muzafaruly Shymkent qalasynda №5 kolledjde tiginshi mamandyǵy boıynsha bilim alǵan.
«Náreste ýaqytynda syrqattanyp, erekshe balalardyń qataryna qosyldy. Sonda da óz qyzyǵýshylyǵynyń arqasynda búginde qolóner sheberi atanyp otyr. Kásibin kıim tigip bastady. Keıin kórpeshelerge arnalǵan quraq qurap, túrli plastık bótelkelerden kórkem gúlder istep, balabaqshalarǵa taratty», deıdi anasy Juldyz Ádeeva.
Arǵy atalary sýretshi bolǵan eken. Anasynyń paıymynsha balasyna qasıet sol atalarynan daryǵan.
Túrkistan oblysy ákiminiń baspasóz qyzmetiniń habarlaýynsha Á.Mahmutbekov memleketten qaıtarymsyz grant alyp, tigin mashınasyn satyp alǵan. Ol aldaǵy ýaqytta kásibin keńeıtip, aýyl jastaryn qolóner salasyna tárbıeleýdi josparlap otyr. «Aýyl amanaty» jobasynyń altynshy baǵyty boıynsha 2,5 paıyzben nesıe alýǵa nıetti. Jergilikti atqarýshy organ ókilderi qajetti qoldaý jumystaryn júrgizip jatyr.