Bir táýlikke sozylǵan demalystan soń Pıreneı túbeginiń soltústik-batysynda ornalasqan Valıadolıd qalasynda «Ispanııa Výeltasy» óz jalǵasyn taýyp, 10-kezeńniń úzdikteri anyqtaldy.
Sprınterler saıysynda ıtalııalyq Fılıppo Ganna shashasyna shań juqtyrmady. «INEOS Grenadiers» klýbynyń sapynda óner kórsetetin 27 jastaǵy veloshabandoz 25,8 shaqyrymdyq qashyqtyqty 27 mınýt 39 sekýndta júrip ótti. Sóıtip, Tokıo Olımpıadasynyń jeńimpazy, Eýropa jáne álemniń eki dúrkin chempıony óziniń kezekti qomaqty jeńisine qol jetkizdi. Ekinshi oryndy ıelengen Belgııanyń betkeustary Remko Evenepýl («Soudal - Quick Step») basty qarsylasynan 16 sekýnd qalyp qoıdy. Úzdik úshtikti Slovenııa sańlaǵy Prımoj Roglıch («Jumbo-Visma») túıindedi. «Astananyń» serkesi Davıd De la Krýs 26-oryndy qanaǵat tutty.
Jalpy esepte amerıkalyq Sepp Kýss («Jumbo-Visma») áli de kósh basynda. Ony ıspanııalyq Mark Soler («UAE Team Emirates») ókshelep keledi. Al fransııalyq Lennı Martınes («Groupama – FDJ») Remko Evenepýlge óz ornyn bosatty.