Bıyl ekinshi ret uıymdastyrylyp otyrǵan «Uly dala joryǵy» respýblıkalyq marafon-báıgesine ár óńirden 19 komanda qatysty. Olar keshe elorda irgesindegi Qarajar aýylynan joryqqa attanyp ketti. Shabandozdar 1 300 shaqyrym qashyqtyqta jarysatyn marafon-báıge 19 qyrkúıek kúni Túrki áleminiń rýhanı astanasy – Túrkistan shaharynda óz máresine jetedi.
Joryqqa qatysýshylardy shyǵaryp salý sharasyna marafonǵa uıytqy bolǵan ulttyq sporttyń janashyrlary – «Amanat» partııasynyń Atqarýshy hatshysy Dáýlet Káribek, Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Bekbolat Baıjanov, Ulttyq sport qaýymdastyǵynyń tóraǵasy Islambek Saljanov, «Joryq» at sporty federasııasy qamqorshylyq keńesiniń tóraǵasy Álibek Áldeneı qatysty.
Aıtýly sharada Ulttyq sport qaýymdastyǵynyń tóraǵasy Islambek Saljanov marafon-báıgeniń mańyzdylyǵyna toqtala kele, jobany uıymdastyrǵan jáne oǵan qoldaý bildirgen azamattarǵa alǵysyn bildirdi.
«Keshe ǵana Ulttyq sport túrleri boıynsha VI festıvaldyń resmı ashylýyn ótkizdik. Al búgin barshamyz ekinshi ret uıymdastyrylyp otyrǵan «Uly dala joryǵynyń» bastalý saltanatyna jınalyp otyrmyz. Ulttyq sport qaýymdastyǵy 2 jyl qatarynan seriktes bolyp, «Uly dala joryǵy» jobasyn qoldap otyr. Ulttyq sportymyz – ata-babalarymyzdan bizge qalǵan asyl murasy jáne amanaty. Ulttyq sporttyń artynda ultymyzdyń rýhy men namysy, tarıhy men salt-dástúri tur. Ulttyq sportymyz – elimizdi biriktiretin negizgi faktorlardyń biri.
Memleket basshysy Qasym-Jomart Toqaev ulttyq sporttyń damýy men nasıhattalýyna erekshe nazar aýdaryp otyr. «Uly dala joryǵy» – álemde joq respýblıkalyq marafon-báıge. Búgin osy báıgege elimizdiń barlyq aımaǵynan 100-den asa shabandoz qatysty. Barlyǵyna sáttilik tileımin!» dedi Islambek Tóleýbaıuly.
«Uly dala joryǵy» marafonynyń jalpy júlde qory – 65 mln teńge. Jeńimpaz komandaǵa – 30 mln teńge, 2-orynǵa – 20 mln teńge, al 3-orynǵa 15 mln teńge tabystalmaq. Marafon-báıgeniń uıymdastyrýshysy Ǵanı Dúıshenovtiń aıtýynsha, joryq barysyn 2 halyqaralyq jáne 2 otandyq tóreshi baǵalasa, al jol boıy attardyń jaǵdaıyn 2 halyqaralyq jáne 3 óz elimizdiń mal dárigeri qadaǵalaıdy.
«Joryq 14 kezeńnen turady. Birinshi kezeń – 50 shaqyrym. Odan keıingi 12 kezeńde 100 shaqyrymdap júrip otyrady. Sońǵy 14-kezeńde 50 shaqyrym joldy baǵyndyryp, Túrkistanda márege jetedi. Atyraý oblysynan basqa barlyq óńirden komandalar qatysyp jatyr, barlyǵy marafonǵa saqadaı-saı. Keshe attar veterınarııalyq tekserýden ótti», dedi Ǵ.Dúıshenov.
Aıta ketsek, «Uly dala joryǵy» marafon-báıgesi respýblıkalyq «Joryq» at sporty federasııasynyń, Týrızm jáne sport mınıstrliginiń, «Amanat» partııasynyń jáne Ulttyq sport túrleri qaýymdastyǵynyń qoldaýymen ótip jatyr.