Taldyqorǵandaǵy Zııatkerlik mekteptiń komandasy robottehnıkadan uıymdastyrylǵan olımpıadanyń jeńimpazy atandy. Almaty qalasynda ótken básekede jetisýlyq órender erekshe kózge tústi. Robottehnıkadan respýblıkalyq olımpıada Birikken Ulttar uıymynyń turaqty damý maqsattaryn oryndaýǵa baǵyttalǵan. Is-shara logıstıka men sıfrlyq ınfraqurylymǵa kómektesetin robottardy jasaý úshin qatysýshylardy bir alańǵa jınaıdy.
Baıqaýdyń basty mindeti – kúndelikti ómirde adamǵa qamqorlyq tanytyp, qyzmet kórsetetin robottardy ázirleý.
Informatıka pániniń muǵalimi Nıkolaı Avdıýnınniń jetekshiligimen taldyqorǵandyq komanda eki jobany usyndy. Ekeýi de «Future Innovators» atalymy boıynsha (úlken jáne orta top) birinshi oryndy jeńip aldy. 9-synyp oqýshylary Dıana Hasımova men Ilıa Stasıýkov konteınerlerdi suryptaýǵa jáne qaıta tıeýge arnalǵan teńiz logıstıkalyq termınalynyń prototıpin jasady.
– Saýda-sattyqtyń 80 paıyzy muhıttar arqyly júzege asady. Saýdanyń damýyn shekteıtin dúnıeler de bar. Sonyń biri – jóneltý portyna keletin konteınerlerdi uzaq kútý. Termınaldy teńiz saýda joldarynyń qıylysyna ornatatyn bolsaq, konteınerlerdi jetkizý jyldamdyǵy artady. Teńiz termınalynda jasandy ıntellekt júıesi ornalasqan. Neırondyq jeli konteınerlerdiń tańbalaryn anyqtap, avtomattandyrylǵan krannyń kómegimen júkterdi júkteı de, túsire de alady, deıdi Dıana.
9-synyp oqýshylary Ranona Jálelqyzy men Karıma Maqannyń biregeı jobasynyń ataýy – «О́rmekshi ana». Spider Mom – adam qoly jetpeıtin jerlerge symdardy óz betinshe tóseýge qabiletti robot.
– Internetke qoljetimdilik – elimizdiń sıfrlyq damýyndaǵy strategııalyq mańyzdy másele. Bul ásirese pandemııa kezinde, álem onlaın rejimge kóshken kezde anyq baıqaldy. Degenmen aýyldyq eldi mekenderdiń barlyǵy ınternetke qol jetkize almaıdy. Bizdiń zertteýimiz boıynsha, elimizde 1 432 aýyldyń 200 myńnan asa turǵyny ınternet ınfraqurylymynsyz otyr. Sıfrlyq teńsizdikti joıyp, azamattardy sapaly baılanyspen qamtamasyz etý mańyzdy, – deıdi jas ónertapqyshtar.
Joba avtorlarynyń aıtýynsha, robot joǵary jyldamdyqty optıkalyq kabeldi bekitýge, tirekterdiń túrlerin, tipti aýa-raıyn anyqtaýǵa qabiletti.
Olımpıada «RoboMission», «Future Innovators», «Future Engineers» sanattary boıynsha ótkizildi. Ár sanatta joǵary upaı jınaǵan jeńimpaz komandalar aldaǵy 7-9 qarashada Panamada ótetin halyqaralyq chempıonatta el namysyn qorǵaıdy.
Jetisý oblysy