Shet aýdanynyń ortalyǵy Aqsý-Aıýly aýylynda, Aqadyr, Sáken Seıfýllın kentinde 30 páterdiń kilti tabystaldy. Aqsý-Aıýlydaǵy qýanyshqa aýdan ákimi Muhıt Muhtarov ortaqtasyp, baspanaly bolǵan otbasylardy quttyqtady.
– Aýdan ortalyǵynda 4 otbasy jańa baspanaǵa ıe boldy. Bul úılerdi alý elimizdegi «Qýatty óńirler – el damýynyń draıveri» ulttyq jobasy aıasynda bastapqy naryqtan turǵyn úı satyp alý arqyly múmkin bolyp otyr. Aqsý-Aıýly aýylynan bólek, aýdanymyzdyń Aqadyr, Sáken Seıfýllın kentterinde 26 otbasyna osyndaı jańa páterlerdiń kilti tabys etildi. Baspanany qoljetimdi etý – Úkimet pen jergilikti ákimdikter tarapynan júzege asyrylyp jatqan mańyzdy josparlardyń biri. Halyqpen ár kezdesýde jıi kóteriletin másele birtindep oń sheshimin taýyp jatyr. Barshańyzdy búgingi qonys toılaryńyzben shyn júrekten quttyqtaımyn! Jańa baspanalaryńyzdyń ishi qýanysh pen shattyqqa tolsyn, – dedi aýdan basshysy M.Muhtarov.
Páterli bolǵan otbasylar memlekettik baǵdarlama aıasynda bastapqy naryqtan úı alýǵa kómek qolyn sozǵan aýdan ákimshiligine alǵysyn jetkizdi. Bul azamattar – osyǵan deıin áleýmettik osal toptaǵy jáne kópbalaly otbasylar sanatynda úı kezeginde turǵandar.
– Kóp ýaqyttan beri páter jaldap keldik. Mine, jańa páter biz úshin úlken syı boldy. Erekshe qýanyshtymyz. Ata-analarymyz da qýanyp jatyr. Qonystoı toılaımyz. Ár qazaq baspanaly bolsyn, – deıdi jańa páter ıesi Nurlan Igenov.
Bıyl «Nurly jer» memlekettik baǵdarlamasy aıasynda Aqadyr kentindegi 12 páterli eki turǵyn úıdiń qurylysy aıaqtalyp, páter kilti taǵy beriledi. Sondaı-aq Aqsý-Aıýly aýylynda 24 páterli turǵyn úıdiń qurylysy bastaldy. Qosymsha jańadan salynyp jatqan birinshi naryqtaǵy turǵyn úılerden jalpy 32 páter satyp alý josparlanyp otyr.
Qaraǵandy oblysy,
Shet aýdany