Premer-mınıstr Álıhan Smaıylov Úkimettiń halyqaralyq qarjy uıymdarymen yntymaqtastyǵy jónindegi úılestirý keńesiniń kezekti otyrysyn ótkizdi.
Is-sharaǵa Dúnıejúzilik bank, Eýropalyq qaıta qurý jáne damý bankiniń ókilderi, ortalyq memlekettik organdar, «Atameken» UKP, «Qazaqstan temirjoly» ulttyq kompanııasy jáne «Samuryq-Qazyna» ulttyq ál-aýqat qorynyń basshylary qatysty.
Otyrysta Almaty, Jambyl, Qyzylorda jáne Túrkistan oblystarynda jalpy aýdany 105 myń gektardan asatyn ırrıgasııalyq jáne drenajdyq júıelerdi salý men rekonstrýksııalaý, sondaı-aq 1 500 aýyldyq eldi mekendi jyldam ınternetke qosýdyń ózekti máseleleri talqylandy. Bul shamamen 200 myń úı sharýashylyǵyn nemese 1 mln-nan asa adamdy qamtıdy.
Sonymen qatar óńirdiń kólik baılanysyn jaqsartýǵa, logıstıkalyq qyzmetter men saýda-sattyqty damytýdy yntalandyrýǵa múmkindik beretin «Qaraǵandy – Jezqazǵan» avtojolyn rekonstrýksııalaý, sondaı-aq Aqtóbe qalasynda jańa káriz-tazartý ǵımarattaryn salý josparlary qaraldy.
Odan bólek, qatysýshylar birqatar temirjoldy jańǵyrtý, jańa jolaýshylar vagondary men elektrovozdardy satyp alý máselelerin talqylady.
Otyrys qorytyndysy boıynsha Premer-mınıstr memlekettik organdardyń birinshi basshylaryna halyqaralyq qarjy uıymdarynan tartylatyn qarajattyń ýaqtyly jáne tıimdi paıdalanylýyna baqylaýdy kúsheıtýdi tapsyrdy.