Qaraǵandy qalasynyń mádenıet, tilderdi damytý, dene shynyqtyrý jáne sport bólimi men «Shyraq» tilderdi oqytý ortalyǵynyń uıymdastyrýymen «Til úzdigi» baıqaýynyń jeńimpazdary marapattaldy.
– Ult ustazy – Ahmet Baıtursynulynyń týǵan kúni jáne Tilder kúni merekesine oraı ótkizilgen shara memlekettik til men shet tilin oqytyp júrgen oqytýshylarǵa qoldaý kórsetý, olardyń kásibı áleýetin damytý, ozyq tájirıbelerin taratý, tilderdi oqytý ortalyqtarynyń oń ımıdjin qalyptastyrýdy maqsat tutady, – deıdi «Shyraq» tilderdi oqytý ortalyǵynyń dırektory Saıat Tuıaqbaev.
Qala ákiminiń «Til úzdigi» syılyǵy 8 atalym boıynsha tapsyryldy. «Úzdik oqytýshy» atalymymen «Shyraq» tilderdi oqytý ortalyǵynyń oqytýshysy Ásııa Smykova, «Úzdik tyńdaýshy» atalymymen «Almagúl» balabaqshasynyń tárbıeshisi Irına Magına marapattaldy. «Úzdik til janashyry» «Balálem» tilderdi oqytý ortalyǵynyń jetekshisi Janna Kuttybaevaǵa buıyrdy. «Shet tilin úzdik oqytýshy» Á.Saǵynov atyndaǵy Qaraǵandy tehnıkalyq ýnıversıtetiniń shet tilder kafedrasynyń aǵa oqytýshysy Gúlsara Amangeldına dep tanyldy. «Mekemeniń úzdik qyzmetkeri» atalymynda oblystyq tilderdi oqytý ortalyǵynyń qyzmetkeri Áset Esmaǵambetov, «Úzdik til maıtalmany» atalymynda tilderdi damytý basqarmasy janyndaǵy resýrstyq til ortalyǵynyń bólim meńgerýshisi Jupar Jaqan top jardy.
«Úzdik jas maman» «Bolashaq» joǵary kolledjiniń oqytýshysy Aqbota Bekimuratova, «Úzdik til mamany» atalymymen qoǵam belsendisi Elmıra Saılaýqyzy marapattaldy.
Jeńimpazdardyń árqaısysyna 250 myń teńge kóleminde aqshalaı syılyq pen dıplomdar tabystaldy.
Qaraǵandy oblysy