MEMLEKETTIK RÁMIZDER MEREKESI

Kókshetaýdaǵy “Birligimiz ja­ras­qan!” patrıottyq aksııasy Qa­zaq­stan Respýblıkasynyń Mem­le­ket­tik rámizder kúninen bastaý alýy­nyń mańyzy aıryqsha. Jalaý­lar jelbiregen Táýelsizdik alańy aı­shyqty bezendirilýimen kóz tar­tady. Merekelik sán-saltanattaǵy qalalyqtardyń kóńilderi kóterińki, júzderi jarqyn. Daýys kúsheıt­kishter arqyly rýH kóterer qymbat rámizderimizdiń qadir-qasıetin pash etken jalyndy sózder erekshe ekpinmen qalyqtaýda. Saltanat Elbasy Nursultan Na­zarbaevtyń bıylǵy Joldaý­yn­daǵy “Salamatty ómir salty men adam­nyń óz densaýlyǵy úshin yn­tymaqty jaýapkershiligi qaǵıdaty – densaý­lyq saqtaý salasyndaǵy jáne ha­lyq­tyń kúndelikti turmy­syndaǵy memlekettik saıasattyń eń basty má­selesi bolýy tıis” degen tapsyr­masynyń tııanaqtylyǵyn dáriptegen sharamen bastaldy. “Olım­pıadalyq júgirý kúni” res­pýb­lıkalyq ak­sııasynyń aıasynda jarys jolyna jeńil atletshiler shyqty. Oǵan oblystyń 52 oqý orny men eńbek ujymdarynan 600 adam qatysty. Qalanyń eń kórikti Abaı kóshesiniń boıymen mektep oqýshylary men stýdentter, ju­mys­shylar men qyzmetkerler, zeınetkerler zamana kóshin alǵa súıreı zymyraýda. – Qazaqstan jastarynyń al­dyn­da úlken mindetter tur, – deıdi jarys jeńimpazy, Aqkól aýdandyq ishki ister bóliminiń qyzmetkeri Aleksandr Chervıakov. –Sondyqtan, biz zamandastarymyzdyń táni saý, jany taza bolýyn qalaımyz. Bul – jaı júgiris emes, zamana kóshinen ozyq bolýdy meńzeıtin júgiris. Jarys jolynda múmkindigi shek­teýli jandar tabandylyq pen batyldyqtyń, namys pen jiger-qýattyń qaıran qalarlyq úlgisin tanytty. Olardy jınalǵan qaýym máre tórinde “bárekeldi” madaq sózderimen, alqyzyl yqylas gúlderimen qarsy aldy. Odan keıin alańǵa Qazaqstan Respýblıkasynyń Memlekettik rámizderin oblys aýmaǵynda na­sıhattaǵan avtojoryq máshıneleri keldi. Aqmola oblysynyń ákimi Ser­geı Dıachenko “Birligimiz ja­rasqan!” patrıottyq aksııasyn ashyp, jınalǵandardy mańyzdy merekemen quttyqtady. Sondaı-aq, óńir bas­shysy jastar arasynda patrıottyq tárbıeni óristetýdegi belsendiligi úshin bir top jasqa “Jyl patrıoty” arnaıy júldesin tap­syrdy. Olar­dyń arasynda soń­ǵy Azııa oıyn­darynda uzyndyqqa sekirýden altyn medaldi jeńip alǵan sport sheberi Lıýdmıla Gran­kovskaıa da bar. Kókshe jastary Mem­lekettik rá­mizder kúni ózderiniń jazǵy eń­bek semestrin bastaýdy ıgi dástúrge aınaldyrǵan. Mine, búgin de áýege stý­denttik eńbek otrıad­ta­rynyń aıyrym belgilerin baılaǵan sharlar ushy­ryl­dy. Jurtshylyq jastar­dyń “Bizdi bıikten kóri­ńizder!” degen ısharatyna qabyl bolsyn aıtty. Aksııanyń resmı bó­limi Táýel­siz­dik alańynda Memlekettik Tý­dyń kóterilýi men Memlekettik Án­urannyń shyr­qa­lýy­men aıaqtaldy. Saltanatty rásimdi atqarý qurmeti oblys ákimi Sergeı Dıachenkoǵa, Kókshetaý qalasynyń qurmetti azamaty, Je­ńistiń 65 jyldyǵyna baılanysty Máskeýdegi Qyzyl alańdaǵy mere­ke­lik paradqa qaty­sý­shy Baltash Seıitovke, “Nur Otan” HDP Aqmo­la oblystyq fı­lı­alynyń “Jas Otan” jastar qanaty jetek­shile­riniń biri Indıra Súleımenovaǵa berildi. Mereke oblys orta­ly­ǵynyń mádenıet mekemeleri ártisteriniń keń kólemdi konserttik baǵdarlama­symen jal­ǵasty. Baqbergen AMALBEK, Aqmola oblysy. RÁMIZDER – ELDIŃ RÝHY Kenshiler qalasy Ekibastuzda elimiz boıynsha respýblıkalyq III pat­rıottar forýmy bolyp ótti. Ota­nymyzdyń energetıkalyq orta­lyq­tarynyń biri sanalatyn ken­shi­ler qa­lasynda bul kúnderi 140 myń halyq turady. Birqatar etnos ókil­deri tatý-tátti ǵumyr keshýde. Eli­miz­diń túkpir-túkpirinen jetken qo­naqtar “Memleket” “Rámiz” “Pat­rıot” taqyrybyndaǵy mıtıngke qa­tysý úshin qaladaǵy “Qaınar” bilim berý jáne salamatty ómir sal­tyn qalyptastyrý keshenine keldi. Bul jasósipirimder men balalarǵa ar­nal­ǵan keshen byltyr “Jol kartasy” baǵdarlamasy aıasynda 155 mıllıon teńge qarjy bólinip, ishi-syrtyna túgeldeı qaıtadan kúrdeli jóndeý, jańartý jumystary júrgizilip paı­dalanýǵa berilgen bolatyn. Balalar úshin 200 oryndyq jıylys zaly, bı zaly, kafe ashylyp, týrıstik qyzyǵý­shy­lyq­qa arnalǵan skalodrom jasal­dy. Jarqyraǵan keshen ishi zamanaýı úlgidegi qural-jabdyqtar, jıhaz­darmen jabdyqtaldy. Qonaqtar keshen ishin aralap kórdi, balalar óz ónerlerin kór­set­ti. Kezek-kezek týrıstik-alpı­nıs­tik skalodromǵa shyǵyp, sporttyq jigerlilikterin baıqatty. Sonymen qatar, balalardyń qadaǵalaýsyz qal­maýlaryn, kámeletke tolma­ǵan­dar arasynda quqyq buzýshylyqtyń aldyn-alý, bos ýaqyttaryn maz­mun­dy ótkizý, azamattyq sana-se­zimdi, patrıotızm men otan­súı­gish­tikke baýlý, salamatty ómir saltyn qalyptastyrý, balalardyń jazǵy demalystaryn uıymdastyrý bul keshendi ortalyqtyń negizgi min­detteri bolyp tabylady. Balalar ár sala boıynsha elimizde ótetin barlyq baıqaýlar men konkýrs­tar­ǵa qatysady. Mıtıngte forýmnyń mártebeli qonaqtary elimizdiń Parlamenti Senatynyń depýtaty, “Nur Otan” HDP janyndaǵy Sy­baı­las jemqorlyqqa qarsy kúres jónindegi respýblıkalyq qoǵamdyq keńes tóraǵasy Oralbaı Ábdikári­mov, akademık Ǵarıfolla Esim, Qazaqstan Respýblıkasyna eńbegi sińgen sáýletshi, Memlekettik El­tańbanyń avtory Jandarbek Máli­bekov, Ekibastuz qalasynyń ákimi Nurlan Nábıev, “Ekibastuz MAES-2” stansasy” AQ-tyń jumysshysy Se­rik Zańuly sóz sóılep, jınal­ǵan­dardy táýelsizdigimizdi asqaqta­tar rámizderdi qurmetteýge, eldiń jar­qyn bolashaǵy úshin halqy­myzdyń yntymaq-birligin qaster­leý­ge shaqyrdy. Egemen eldiń rýhy – Mem­le­ket­tik Ánuran shyrqalyp, eldiń tutastyǵyn pash etetin Eltańbasy jarqyraǵan, kókte asqaq baıraǵy – Týy jelbiregen saltanatty sha­rada ekibastuzdyq ónerpazdar Láz­zat Shýshaeva, Aleksandr Vereshak, Qýat Qudaıqulov, “Arman” vokal­dyq toby patrıottyq ánderdi áýeletti. Farıda BYQAI, Pavlodar oblysy, Ekibastuz qalasy. MEMLEKETTIK RÁMIZDER – BIIK MEREIIMIZ Bıylǵy tabıǵat tańǵalarlyq­taı. Jazymyz jańbyrly, qala­myz da, dalamyz da jasanyp-aq tur. Al, maýsymda ótken jyly paı­dalanýǵa berilgen ásem Aq­taý­daǵy “Memle­ket­tik rámizder” ala­­ńy barlyq kúni derlik sal­ta­natty sharalarǵa toly bolýda. Ony bári de jańa alańda alystan menmun­da­lap turǵan  táýel­siz Qazaq eli­niń alyp Kók baıraǵynyń astyn­da ásem de áserli ótip jatady. Keshe ǵana “Nur Otan” HDP Mańǵystaý oblystyq fılıaly El pre­zıdenti Nursultan Nazar­baev­tyń “Jasyl el” baǵ­darlamasyn júzege asyrý maqsa­tyn­da aqtóbe­likterdiń “Aýyldyń kór­keıýi – eldiń kórkeıýi” atty marafon-estafetasyn aımaqta “Jasyl baqty Mańǵystaý” degen ataýmen jalǵastyrǵan aýqymdy aksııa ótkizgen-di. Onda jınal­ǵan­dar kópshilikti ólkemizdi kók je­lek­ke bólengen aımaqqa aınal­dy­rýǵa shaqyrdy. Barsha turǵyn­darǵa, jastarǵa úndeýde árbir aýylda “Bal­bóbekter baǵyn”, “Jas ulan­dar baǵyn”, “Mektep túlek­teri­niń alleıasyn” qurýǵa usynystar ja­saldy. Al bul kúni aksııa bastalǵanǵa deıin kóshedegi radıodan pat­rıot­tyq ánder shyrqalyp turdy. О́ıt­keni, shara maqsaty jastary­myz­dy qazaqstandyq patrıo­tızm­ge tárbıe­leý, dostyq, tatý­lyqqa, respýb­lı­ka­myzdyń Mem­lekettik rámizderin qurmetteýge shaqyrý boldy. Elimiz­diń boı­tuma­ryndaı Týymyzdyń, Eltań­bamyz ben Án­ura­nymyzdyń mán-mańyzyn, qa­dir-qasıetin tereń­dete nasıhattaý edi. Son­dyq­tan da ortalyq alańnan “Mem­le­ket­tik rámizder” alańyna bet alǵan­dar “Nur Otan” HDP “Jas Otan” jastar qanaty­nyń jastary, “Aqtaý” stýdentter alıansy, “Ja­syl el” jasaqtary, joǵary, arnaý­ly oqý oryndary­nyń stýdentteri boldy. Olardyń bári ózderiniń Qazaqstannyń azamaty ekendik­te­rin, táýelsiz Qazaq eliniń mem­leket­tik rámiz­derin, tilimiz ben má­denıetimizdiń alyp bergen eń asyl jaquttary ekendigin án men jyrǵa qoty. Tús aýa jastar sherýi ortalyq kóshedegi áıgili aqyn Qashaǵan Kúrjymanulynyń eskertkishi tusynan bastalyp, “Memlekettik rámizder” alańyna keldi. Bul jerde el bolashaqtaryn oblys, qala bas­shylary, qoǵamdyq uıymdar ókil­deri men Aqtaý qalasynyń qurmetti azamattary qar­sy aldy. Oblys ákiminiń oryn­basary Qanybek Jumashev:  “Memlekettik rámizder eldigimiz­diń beınesi, egemendigimizdi áıgileıtin erekshe ulttyq qasterli belgiler. Olardy qasterleı biletin sizder, jastar – elimizdiń bola­sha­ǵy, táýelsizdigimizdiń tiregisiz­der”, – dedi. Saltanatta “Nur Otan” HDP jastar qanatynyń atqarýshy hatshysy N.Qarasaev, Aqtaý gýma­nıtarlyq kolledjiniń ozat stýdenti S.Panova, áskerı qyzmetker B.Es­maǵanbetov, t.b. sóz sóıledi. “Jas Otan” jastar qanatyna músheler saltanatty túrde qabyldandy. Úlken órleý ústinde ótken patrıottyq aksııa sońy oblystyń belgili kórkem­óner­pazdarynyń konsertine ulasty. Jolaman BOShALAQ, AQTAÝ.