Qarjy monıtorıng agenttiginiń Shymkent qalasy boıynsha departamenti Bıznes quqyqtaryn qorǵaý jáne kóleńkeli ekonomıkamen kúres boıynsha júrgizilip jatqan jumys aıasynda tanymal energetıkalyq sýsyn shyǵaratyn jasyryn sehtyń qyzmetin toqtatty, dep habarlaıdy Egemen.kz.
«Qalalyq sanıtarlyq-epıdemıologııalyq baqylaý departamentiniń mamandary jáne saýda markasynyń quqyq ıelenýshiniń ókilderi jedel-izdestirý is-sharalaryn júrgizdi. Nátıjesinde 21 myń qutydan astam kontrafaktilik sýsynnyń daıyn ónimderi, taýar belgisi bar 54 myń danadan astam energetıkalyq sýsyndy quıýǵa arnalǵan jabdyq, sııa búrikkish japsyrma, oraý qurylǵylary, qaqpaqtar, qurǵaq qospalar tárkilendi», delingen vedomstvo habarlamasynda.
Keltirilgen shyǵyn kólemi 37 mln teńgeden asady. Ulttyq saraptama ortalyǵynyń mıkrobıologııalyq zertteý hattamasyna sáıkes, tárkilengen sýsynnyń quramynda ruqsat etilgen mólsherden eki ese joǵary zeń men ashytqy bar.
«Bul ónim tutynýǵa jaramsyz, óıtkeni ol adam densaýlyǵyna, ásirese jas aǵzaǵa zııan keltiredi. Atalǵan fakti boıynsha sotqa deıingi tergeý bastaldy. Tergeý múddesindegi basqa aqparat jarııa etilmeıdi», delingen habarlamada.
Aıta keteıik, QR Konstıtýsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-prosestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.