Jetisýda teatr sańlaǵy, áıgili aktrısa Bıken Rımovanyń 100 jyldyǵyna arnalǵan «BIKEN» I Halyqaralyq teatr festıvali ótedi. Aıtýly is-sharaǵa óńir ákimi qoldaý kórsetip otyr. Odan bólek TÚRKSOI halyqaralyq uıymy da atsalyspaq. Onǵa jýyq memleketten kelgen teatr maıtalmandary Taldyqorǵan tórinde baq synaıdy, dep habarlaıdy Egemen.kz.
Kúni keshe Jetisý jerine TÚRKSOI halyqaralyq uıymynyń bas hatshysy Sultan Raev arnaıy issaparmen keldi. Ol kıeli óner ordasy B.Rımova atyndaǵy Taldyqorǵan drama teatrynyń uıymdastyrýymen qolǵa alynǵan festıvaldiń jumys josparymen tanysty.
Saltanatty jıynnyń maqsaty – sahna sańlaǵy Bıken Rımovanyń 100 jyldyǵyn merekeleý, sonymen qatar, rejısserler men akterler arasynan kásibı qoltańbasy qalyptasqan úzdik sahnagerlerdi anyqtaý. Oǵan Qazaqstannan Ǵ.Músirepov atyndaǵy Qazaq Memlekettik Akademııalyq balalar men jasóspirimder teatry, N.Jantórın atyndaǵy Mańǵystaý oblystyq mýzykalyq drama teatry, J.Aımaýytov atyndaǵy Pavlodar oblystyq qazaq mýzyka-drama teatry, S.Seıfýllın atyndaǵy Qaraǵandy oblystyq akademııalyq drama teatry, Almaty qalalyq Mádenıet basqarmasynyń «Jańa ǵasyr» teatry, Astana qalalyq «Mýzykalyq jas kórermen teatry» jáne shet elden Túrkııa, Ázerbaıjan, Túrkmenstan, О́zbekstan, Qyrǵyzstan memleketteri qatysady.
Baǵdarlama aıasynda Bıken Rımovanyń bıýsti saltanatty túrde ashylady. Sonymen qatar ǵasyrǵa jýyq tarıhy bar M.Áýezov atyndaǵy Qazaq ulttyq drama teatry festıvaldiń shymyldyǵyn Bıken Rımova basty róldi somdaǵan «Eńlik-Kebek» qoıylymymen ashpaq. Onyń basty sebebi, áıgili aktrısanyń tól teatrǵa ǵumyrynyń basym bóligin arnaǵany bolyp otyr.
Sultan Raev teatrdyń shyǵarmashylyq ujymymen kezdesý barysynda teatr ujymyna shyǵarmashylyq tabys tileı otyryp, halyqaralyq festıvalge qatysýǵa daıyn ekendigin jetkizdi. Sondaı-aq Uıym aıasyndaǵy belsendi jumysy úshin Jetisý oblysynyń ákimshiligine B.Rımova atyndaǵy Taldyqorǵan drama teatryna sáttilik tilep, halyqaralyq teatr festıvaliniń joǵary deńgeıde ótkizýge TÚRKSOI teatrlar arasyndaǵy baılanystardy nyǵaıtýǵa zor úles qosatynyn aıtty Al óz kezeginde teatr dırektory Erlik Jýasbek Sultan Raevqa alǵys bildirip, qazaqy dástúrmen qamshy jáne Bıken Rımovanyń fotoalbomyn syıǵa tartty.
Bıyl TÚRKSOI deńgeıinde teatr jáne kıno aktrısasy Bıken Rımovanyń 100 jyldyǵy, qoǵam qaıratkeri Temirbek Júrgenovtyń 125 jyldyǵy, jazýshy Maǵjan Jumabaevtyń 130 jyldyǵy, qazaq aqyny, ádebıettanýshy, jazýshy Muzafar Álimbaevtyń 100 jyldyǵy túrki tildes elderde keńinen atalyp ótedi.
Aıta keteıik, teatr festıvali halyqaralyq deńgeıde ótkiziletin bolǵandyqtan qazylar alqasynyń músheleri Qazaqstanmen qosa, Ázerbaıjan, Bashqurtstan elderinen saraptaldy.
Jetisý oblysy